صوفی شاعر خواجہ غلام فرید کے ایک سو انہترویں یوم ولادت کے سلسلے میں تقریبات ڈیرہ غازی خان کے علاقے کوٹ مٹھن میں گزشتہ دنوں منائی گئیں۔

حضرت خواجہ غلام فرید 1261 ہجری میں چاچڑاں میں پیدا ہوئے۔ آپ کا شجرہ نسب حضرت عمر فاروق رضی اللہ تعالی عنہہ سے ملتا ہے۔ آپ کی تعلیمات میں بھائی چارے اور امن و محبت کا درس ملتا ہے جس سے متاثر ہو کر ہزاروں غیر مسلم مشرف بہ اسلام ہوئے۔

تقریبات میں ملک بھر سے زائرین شریک ہیں جن کی سیکورٹی کے لئے سخت انتظامات کئے گئے تھے۔ خواجہ غلام فرید نے رنگ و نسل سے بالا ہو کر انسان دوستی،اخوت اور بھائی چارے کا درس دیا ہے۔

خواجہ حسن نظامی کہتے ہیں کہ میں گیارہ سال کی عمر میں اپنے مرحوم والد کے ہمراہ سب سے پہلے تونسہ شریف ضلع ڈیرہ غازیخان صوبہ سرحدی گیا تھا اور حضرت شاہ اللہ بخش صاحب رحمۃ اللہ علیہ کے ہاتھ پر حسبِ ہدایت والدِ ماجد بیعت کی تھی (جنکے میرے والد اور تمام خاندان والے مرید تھے) پھر والد کے انتقال کے بعد اپنے برادرِ مرحوم سید حسن علی شاہ کے ہمراہ سولہ برس کی عمر میں حضرت خواجہ غلام فرید صاحب رحمۃ اللہ علیہ سجادہ نشیں چاچڑاں شریف علاقہ ریاست بہاولپور کی خدمت میں حاضر ہوا اور بھائی کے کہنے سے ان سے بیعت کی۔ (یہ دونوں ارادتیں اپنے ارادہ اور اپنے خیال سے نہ تھیں کیونکہ اس وقت اسکی عقل نہ رکھتا تھا۔) اسکے بعد درگاہ حضرت بابا فرید الدین گنج شکر رحمۃ اللہ علیہ میں بمقام پاکپٹن شریف ضلع منٹگمری حضرت مولانا پیر سید مہر علی شاہ صاحب سے بہ اشارہ روحِ حضرت بابا صاحب و بحسنِ عقیدت ذاتی خوب سوچ سمجھ کر بیعت کی۔ اس وقت میری عمر 24 سال کی تھی اور میں نے تعلیم و مطالعہ کے ذریعہ سے معلوماتِ تصوف کا کچھ ذخیرہ مہیا کر لیا تھا۔ (یہ آخری بیعت حضرت خواجہ اللہ بخش اور حضرت خواجہ غلام فرید کے وصال کے بعد ہوئی تھی۔)

دست بدست مرید ہوا تھا، مرید ہونے کے بعد دینی ترقی تو فوراً شروع ہو گئی اور دنیاوی حالت میں اتنا زوال ہوا کہ فاقہ کشی کرتا رہا۔ معیشت کا اطمینان 1908ء سے ہوا جسکو گیارہ سال ہوئے۔ اسکے بعد دنیاوی ترقی بھی برابر عروج کرتی رہی۔

مرید ہونے کی ترغیب خود میرے دل نے دی۔ میں حضرت خواجہ اللہ بخش صاحب رحمۃ اللہ علیہ اور غلام فرید صاحب رحمۃ اللہ علیہ کو کامل اور مکمل پیر تصور کرتا تھا مگر ان کے بقیدِ حیات نہ ہونے کے سبب ایک زندہ ہادی کی ضرورت تھی، اس واسطے اکثر استخارے کیا کرتا تھا کہ کسی رہنما کا پتہ ملے۔ ایک رات حضرت محبوب الٰہی (رض) کو خواب میں دیکھا کہ حضور دریافت فرماتے ہیں "کس کے مرید ہو؟۔ عرض کیا میں خود آپ سے پوچھتا ہوں کہ کس کا مرید ہونا چاہیئے، فرمایا اپنے آپ کو دیکھو۔"

میں نے تعبیر لی کہ اصلاح نفس کا اشارہ ہے جسکی تعمیل میں میں نے مدتوں کتابیں دیکھ دیکھ کر مجاہدے کیے۔ اسکے بعد خیال آیا کہ حضرت محبوب الٰہی (رض) نے میرے نسب کا اشارہ نہ کیا ہو کہ میں حضرت محبوب الٰہی (رض) کے نسب میں ہوں۔ اپنے آپ کو دیکھنا گویا خود حضرت کے طرزِ عمل کو دیکھنا ہے۔ اس واسطے ارادہ ہوا کہ جسطرح حضرت محبوب الٰہی (رض) اپنے پیر حضرت بابا گنج شکر (رض) کی خدمت میں دہلی سے پاکپٹن شریف تک پیدل جایا کرتے تھے میں بھی پیدل جاؤں مگر اتنی ہمت نہ کر سکا تاہم منچن آباد سے پاکپٹن تک پیدل گیا جو غالباً بارہ کوس کا فاصلہ ہے اور ریگستانی راستہ ہے۔

یہ سفر بہت بے سر و سامانی کا تھا، نہ کوئی آدمی ساتھ تھا نہ پیسہ جیب میں تھا نہ روٹی، بھوکا پیاسا ایک شوق اور لطف میں روانہ ہو گیا تھا۔ بارہ بجے دن کو دریا کے کنارے پہنچا، کشتی موجود نہ تھی، پیدل چلنے کی عادت نہ تھی راستہ صاف نہ تھا۔ گرمی کی شدت اور دھوپ کی تیزی سے حواس گم تھے۔ کنارہ پر جا کر بیٹھ گیا، بھوک نے اتنا بے حال کیا کہ وہیں نیم غشی کی سی حالت طاری ہو گئی، اتنے میں کوئی درویش مسافر آئے، انکے پاس آدھ سیر کی ایک موٹی روٹی تھی اس میں سے انہوں نے مجھ کو پاؤ روٹی دی اور مسکرا کر کہا۔ "اسکو کھاؤ، پانی پیؤ، تم کو تو روٹی تقسیم کرنی ہے ابھی سے بیہوش ہو گئے۔" میں نے وہ ٹکڑا کھایا، دریا کا پانی پیا، کشتی آ گئی اس میں سوار ہو کر پار گئے اور شام کو پاکپٹن شریف پہنچ گئے۔

رات کو میں نے حضور بابا صاحب کے مزار پر عرض کیا کہ طلبِ شیخ میں حاضر ہوا ہوں، صبح کو خود بخود حضرت پیر مہر علی شاہ صاحب کی طرف دل مائل ہوا اور میں نے اسی وقت انکے پاس حاضر ہو کر بیعت کر لی۔