اردو ادب کو دنیا بھر میں روشناس کرانے اور ادب کی آبیاری میں جو مقام فیض احمد فیض کا ہے وہ کسی اور شاعر کو حاصل نہیں ہوا۔ فیض احمد فیض نے سات جنوری انیس سو گیارہ کو سیالکوٹ کے ایک پڑھے لکھے گھرانے میں آنکھ کھولی، فیض نے قلم کاری کا آغاز شاعری سے کیا اور اردو اور پنجابی میں شاعری کی۔ بعد میں وہ صحافت سے منسلک ہوگئے اور صدائے حق بلند کی۔
انہوں نے ادبی صورتحال اور ملکی حالات پر مضامین بھی تحریر کئے۔ جو بعد میں کتابی شکل میں شائع ہوئے۔فیض احمد فیض شروع سے ہی انقلابی ذہن کے حامل تھے۔ وہ ایک طویل عرصے تک انجمن ترقی پسند مصنفین کے سرگرم رکن رہےاورآمریت اور ظلم کے خلاف قلمی جہاد کے ساتھ ساتھ عملی کردار بھی ادا کیا۔

فیض کی شاعری میں جہاں حسن جاناں کی مداح سرائی نظر آتی ہے وہیں غمِ دوراں کے مصائب بھی سر اٹھائے نظر آتے ہیں۔
فیض نے ساری دنیا کو اپنا گھر سمجھا اور اس کے دکھ کو اپنا دکھ جان کر ضبطِ تحریر میں لائے۔ انہوں نے ملک عزیز سمیت دنیا بھر میں کہیں بھی ہونے والے انسانیت سوز مظالم کے خلاف آواز اٹھائی اور اس کی پاداش میں قید و بند کی صعوبتیں بھی برداشت کیں۔

فیض احمد فیض کی اعلیٰ ادبی خدمات کے صلے میں حکومت پاکستان کی طرف سے انہیں ملک کا سب سے بڑا سول ایوارڈ نشانِ امتیاز اور سوویت یونین کی جانب سے لینن پرائزعطا کیا گیا۔ اس کے علاوہ انہیں نگار ایوارڈ اور پاکستان ہیومن رائٹس سوسائٹی کی طرف سے امن انعام سے بھی نوازا گیا۔

فیض احمدفیض کے دس شعری مجموعے منصئہ شہود پر طلوع ہوئے اور اردو ادب میں ہمیشہ کے لئے امر ہوگئے۔ ان کی شعری کلیات 'نسخہ ہائے وفا' کی نام سے آج بھی عمدہ شاعری کا ذوق رکھنے والوں کی پسندیدہ کتاب ہے۔ فیض کی شاعری کو اردو، پنجابی، ہندی، انگریزی اور روسی سمیت متعدد زبانوں میں ترجمہ کیا گیا۔

 فیض احمد فیض بیس نومبر انیس سو چوراسی کو انتقال کرگئے۔ مگر ظلم اور آمریت کے خلاف ان کی شاعری ہمیشہ مشعل راہ کی طرح روشن رہے گی۔