شوکت علی ناز کے پہلے شعری مجموعہ کلام چاہتوں کا خمارکی پاکستان میں تقریبِ رونمائی

قطر کے معرو ف شاعر ،شائقینِ فن دوحہ کے صدراورعالمی شہرت یافتہ تنظیم مجلس فروغِ اردو ادب کے پروگرام منیجرشوکت علی نازگذشتہ دنوں چھٹیاں گزارنے پاکستان گئے تو ان کے احباب اوردیگر ادبی حلقوں میں ان کی خوب پذیرائی ہوئی،


بزمِ شانِ قلم انٹر نیشنل(کھڑیانوالہ)فیصل آبادکے زیرِ اہتمام شوکت علی ناز کے پہلے غزلیات کے مجموعہ ’’چاہتوں کا خمار‘‘
کی رونمائی عمل میں آئی

اس خوبصورت ادبی شام کی صدارت ناروے سے تشریف لائے شاعرضمیرطالب نے فرمائی، مہمانِ خصوصی شوکت علی ناز اور شہزاد پارس ہاشمی تھے، جبکہ افضل گوہر اور آفتاب احمد آفتاب کے نام شامِ غزل کاخاص اہتمام تھا۔

تلاوتِ کلامِ پاک کی سعادت صدرِ تنظیم عقیل جاوید نے حاصل کی،معروف شاعر علیم الرحمن حیدر نے نعتِ رسولِ مقبول نہایت خوبصورت ترنم سے پیش کرکے نشست میں روشنی بکھیر دی۔’’چاہتوںکاخمار‘‘کی رونمائی کھڑیانوالہ کی معروف علمی اور سماجی شخصیت جاوید رنداوانے میڈم شان کی ہمراہی میں فرمائی اور اپنے تاثرات کا اظہار کرتے ہوئے صاحبِ کتاب کو دل کی گہرائیوں سے مبارکباد پیش کی،تنظیم کی روحِ رواںمعروف شاعرہ شان نے اپنے نہایت پر مغز مقالے میںشوکت علی ناز کی شاعری اوران کی ادبی خدمات کا احاطہ کیااور انہیںاپنی تنظیم بزمِ شانِ قلم انٹرنیشنل کے چیئر مین کا عہدہ سونپ کر ان کی ادبی ذمہ داریوں میں مذید اضافہ کر دیا۔جسے قبول کرتے ہوئے شوکت نے دامِ،درھمے،سخنے اپنی خدمات کا اعادہ کیا۔

اس سلسلے کے دوسرے مضمون میں شہزاد پارس ہاشمی نے شوکت علی ناز کی شخصیت اورشاعری کا بھر پورجائزہ پیش کیا، تنظیم کے سینئر رکن اور معروف شاعرغلام مرتضیٰ قمر۔ نے شوکت علی نازکو اپنی پنجابی نظم میں بھر پور خراجِ تحسین پیش کیا’’ تیرے آون نال بہار سجن،تو پھلاں دی مہکار سجن‘‘ ۔۔اس ادبی شام کی نظامت کے فرائض صاحبِ طرز شاعرنعیم شجاع نے بڑی خوبصورتی سے ادا کئے اور مجموعہ ھذا سے اپنے پسندیدہ اشعار کے انتخاب سے نظامت میں نئی روح پھونک دی جسے تمام شعراء اور سامعین نے خوب سراہا،مقامی شعراء کرام کے علاوہ فیصل آباد،میانوالی،بکھر،لاہور اور دیگر شہروںسے مقبول و معروف شعراء میںعالمی شہرت یافتہ نابیناشاعر سلیم شاہد نے اپنی معروفِ زمانہ غزل۔۔’’میرے دل کی دنیا میں آکر تو دیکھو‘‘ ترنم سے سنا کر مشاعرے کو دو آتشہ بنا دیا

صدرِ مشاعرہ ضمیر طالب،احمد خیال،شان ،علیم الرحمن حیدر اورشوکت علی نازکے کلام کوسامعین نے بے حد سراہا،دیگر شعراء کو بھی ہر اچھے شعر پر زبردست تالیوں کی گونج ا ورواہ واہ سے حاضرین نے خوب داد و تحسین سے نوازا،مشاعرے میں شریک شعرائے کرام کے اسمائے گرامی حاضر ہیں۔

فریاد علی عاصم،نوشیرسائیں،عمر حیات کیفی ،غلام مصطفی قمر،علیم الرحمن حیدر،عقیل جاویدحیدر،اقبال ناز،سلیم شاہد، عابد ملک،سعید عاصم،محترمہ شان، احمدخیال، نعیم شجاع،شہزاد پارس،آفتاب احمد آفتاب،ڈاکٹر بشیر احمد، شوکت علی نازاور ضمیر طالب۔نشست کے اختتام پر لذتِ کام ودہن کا بہترین انتظام کیا گیا تھا، رپورٹ: نعیم شجاع