اسلام آباد سے ملنے والی خبر کے مطابق اسلام آباد کی موقر اور مقبول مرحوم شخصیت خواجہ مرتضیٰ مرحوم کے چھوٹے بیٹے نجیب مرتضیٰ کو آج اتوار 16 مئی  کو بارہ کہو کے قریب ''کوری'' کے مقام پر سپرد خاک کر دیا گیا۔

چھپن سالہ نجیب مرتضیٰ کا انتقال اچانک حرکت قلب بند ہو جانے سے ہفتہ پندرہ مئی کی سہ پہر ہوا جب وہ معمول کے مطابق گالف کھیل کر واپس آئے۔

انا اللہ و انا الیہ راجعون

نجیب مرتضیٰ نے اپنے پسماندگان میں اپنہ اہلیہ نازنین کے علاوہ ایک بیٹی اور بیٹا چھوڑے ہیں۔ مختلف شعبوں میں ملازمت کرنے کے بعد وہ اپنی اہلیہ نازنین کے ہمراہ ان دنوں تعلیم کے شعبے سے منسلک تھے اور اسلام آباد میں کوری کے مقام پر ہی ایک معیاری درسگاہ کی تعمیر میں مصروف تھے

عالمی اخبار کے مدیر اعلیٰ صفدر ھمدانی، انکی اہلیہ ماہ پارہ صفدر ،اخبار کی تمام انتظامیہ اور قارئین نجیب مرتضی مرحوم کے بھائی ابراہیم مرتضیٰ،انکی اہلیہ گلناز ابراہیم اور نجیب مرحوم کے تمام اہل خانہ سے دلی افسوس کا اظہار کرتے ہیں اور دعا گو ہیں کہ خالق موت و حیات مرحوم کو جوار سید الشہدا میں جگہ دے اور پس ماندگان کو صبر جمیل عطا فرمائے

نجیب مرتضیٰ کا تعلق اسلام آباد کے مقبول دینی اور سماجی گھرانے سے تھا۔ انکے والد مرحوم خواجہ مرتضیٰ کو انہی حوالوں سے ہمیشہ قدرو منزلت کی نگاہ سے دیکھا گیا ہے

نجیب مرحوم کے دیگر بھائیوں میں خواجہ اعظم،خواجہ مجتبیٰ، خواجہ مصطفیٰ اور ابراہیم مرتضیٰ  شامل ہیں۔

ابراہیم مرتضیٰ ماہ پارہ صفدر کی چھوٹی بہن گلناز ابراہیم کے شوہر اور صفدر ھمدانی کے ہم زلف ہیں۔

نجیب مرتضیٰ کی بڑی بہن شاہدہ کاظمی اور اظہار کاظمی ان دنوں امریکہ واشنگٹن میں مقیم ہیں اور نشریات کی دنیا کے علاوہ ٹی وی ڈراموں کے حوالے سے انکا نام کسی تعارف کامحتاج نہیں۔ اظہار کاظمی اور شاہدہ کاظمی گزشتہ طویل عرصے سے وائس آف امریکہ کی اردو سروس سے منسلک رہے ہیں۔

ہم سب دعا گو ہیں کہ پروردگار مرحوم کو باغ ارم میں جگہ عطا فرمائے۔آمین