عالمی اخبار کے ادارتی بورڈ نے برلین میں مقیم عبدالمناف غِلزئی کو عالمی اخبار کے شعبہء گرافکس کا نگراں مقرر کیا ہے اور مدیر اعلیَ ،نائب مدیر اعلیٰ اور معاون مدیر اعلیٰ سمیت تمام اراکین نے یقین ظاہر کیا ہے کہ جناب عبدالمناف غِلزئی کی شمولیت سے اخبار کے بصری حُسن میں مزید اضافہ ہو گا کیونکہ ٹینالوجی کے اس عہد میں گرافکس کو انٹرنیٹ میں مرکزی اہمیت حاصل ہے

عبدالمناف غِلزئی عالمی اخبار کے آغاز سے اسمیں کئی حیثیتوں سے حصہ لے رہے ہیں خاص طور پر بلاگ میں انکی دلچسپی اور تبصرے انکی انفرادیت ہے۔

عبدالمناف غِلزئی نے ہائی سکول کی تعلیم  اسلام آباد 1974 میں مکمل کی جس کے بعد کالج کی تعلیم  راولپنڈی میں 1976 میں پایہ تکمیل کو پہنچی۔ مزید اعلیٰ اور مخصوص تعلیم کے لیئے انہوں نے یونیورسٹی میں ( آرکیٹیکچر) کے شعبے کو منتخب کیا اور اسمیں اختصاص کے لیئے وہ، 1982 ۔1977 تک تاشقند، سابقہ شوروی اشتراک میں رہے۔

جناب عبدالمناف غِلزئی 1982  سے جرمنی کے شہر برلین میں قیام پذیر ہیں اور یہیں سے انہوں نے کمپیوٹر ایڈِڈ ڈیزائیننگ و گرافک ڈیزائیننگ وغیرہ میں 1991  میں خصوصی مہارت و تعلیم مکمل کی۔

عبدالمناف غِلزئی کو شعر کو شاعری سے بھی دلچسپی ہے اور وہ خود بھی شعر کہتے ہیں اور اسکے علاوہ انہیں متنوع موضوعات پر مطالعے کا شوق ہے۔ انکی ایک کتاب “اور مجھے منزل مل گئی“کے عنوان سے 2003 میں شائع ہوئی  جسے اہل علم نے بہت پسند کیا۔

انہیں صحافت سے بھی دلچسپی ہے اور اسی باعث وہ  2005 سے بطور مدیر سہ ماہی دینی مجلہ “پیغامِ نجات“  کی باقائدہ اشاعت کا اہتمام بھی کر رہے ہیں۔ وہ دینی اور عمل و ادبی تنظیموں سے بھی وابستہ ہیں۔

عالمی اخبار میں انکی گرافکس تخلیقات گاہے بگاہے شائع ہوتی رہتی ہیں لیکن اب ادارہ انکے اس فن سے تکنیکی اور فنی سطح پر مستفید ہو گا۔

عالمی اخبار کا ادارتی عملہ،قلم کار،قارئین اور بلاگ کے شعبے کے احباب انہیں اس تقرر پر دلی مبارکباد پیش کرتے ہیں