عجب سماں ہے عجب فضا ہے
کہیں کراچی میں خون پانی سے زیادہ سستا
کہیں پہ بند اپنے گھر کو جانے کا
شہر بھر سے گزرنے والا ہر ایک رستہ
کہیں پہ جلتے ہوئے مکاں ہیں
کہیں خود اپنے ہی خوں میں لتھڑے ہوئے جواں ہیں
کہیں ہے سڑکوں پہ خون بہتا
کہیں پہ سیلاب نے ساری بستی کو ایک پل میں نگل لیا ہے
کہیں پہ خود کُش نے پھر کسی خانہء خدا کو
ھدف بنایا ہے فجر کے وقت
یہ پاک دھرتی نہ جانے کیسے رزیل لوگوں کے ہاتھ میں ہے
کہ ملک پانی میں بہہ گیا ہے
انہیں یہ احساس ہی نہیں ہے کہ لوگ پتوں پہ جی رہے ہیں
خود اپنا ہی خون پی رہے ہیں
لہو سے زخموں کو سی رہے ہیں
وطن میں قبریں بھی کم ہوئیں تو تمام لاشوں کو نزرِ آبِ رواں کیا ہے
وہ سیلِ تند خو کہ جس نے کتنے گھروں کو پل بھر میں
دیکھ لو بے اماں کیا ہے
مگر یہ حاکم کہ ان غریبوں کے دکھ سے بھی آشنا نہیں ہیں
جو ووٹ دیکر خود اپنے قاتل کے ہاتھ مضبوط کر رہے ہیں
مرے وطن کی زمیں پہ جیسے لہو کے پودے اُگے ہوئے ہیں
ہر ایک بستی میں موت کا جیسے رقص جاری
کہیں پہ سیلاب ڈس رہا ہے
کہیں مسلماں خود اپنے بھائی کے خون سے ہاتھ رنگ رہا ہے
کہیں پہ خود کُش اُڑا کے خود کو بسوئے جنت رواں ہوا ہے
یہ ملکِ امن و اماں جو اب ملکِ جنگ لگتا ہے
اسکو اپنے ہی گھر کے لوگوں نے لوٹ ڈالا
یہاں گھروں کے ہیں در مقفل
جو بچ گئے ہیں وہ رزقِ آبِ رواں بنے ہیں
عجب ستم ہے کہ مُلک بھر میں ہے موت کا جیسے رقص جاری
مگر یہ حاکم کہ اپنے بچوں کو لے کے یورپ میں گھومتے ہیں
بلادِ مغرب سے کہہ رہے ہیں
ہمارے بچے تو پیدا ہوتے ہی حکمراں تھے
یہ آج بھی کل کے حکمراں ہیں
عجب ستم ہے کہ ملک اک گھر کی جیسے جاگیر بن گیا ہے
حصارِ ظلمت عوام کی جس طرح سے تقدیر بن گیا ہے
وطن میں ہر روز گولیوں سے غریب شہری کہ مر رہے ہیں
مگر یہ حاکم کہ گھر سے باہر ہیں گھر کی انکو خبر نہیں ہے
کٹے ہوئے ہیں جو سر تو اِن میں خود انکے بچے کا سر نہیں ہے
ذرا بھی ان پہ اثر نہیں ہے
بنامِ حاکم یہ داغِ ذلت ہیں اور کچھ باخدا نہیں ہیں
یہ ناگ وہ ہیں جو اپنی ہی سرزمیں میں بیٹھے ہوئے تھے چھُپ کر
بلوں سے باہر اب آ چکے ہیں
یہ ناگ وہ ہیں جنہوں نے اپنے ہی گھر کے لوگوں کو ڈس لیا ہے
یہ میری آنکھوں میں کیسا منظر ٹھہر گیا ہے
میں جیسے صحرا میں پیاسا تنہا بھٹک رہا ہوں
عجیب صحرا ہے جسمیں ہر سو فقط ہے بھوک اور تشنہ لبی کا غلبہ
فضا میں جیسے لہو کا کڑوا سا ذائقہ ہے
نگاہوں میں جو ہزاروں چہرے ہیں ماتمی ہیں
سنو اے آزردگانِ شب اب یہ طے ہوا ہے
کہ اب کسی بھی غنیمِ فاقہ کشاں کے ہاتھوں پہ بیعتِ دل روا نہ ہو گی
کہ اقتدارِ طویل کے لالچی لٹیروں نے جسم و جاں میں نقب لگائی
ہماری آنکھوں کو اپنی لالچ کے اندھے نیزوں پہ یوں پرویا
کہ ساری بینائی گندے پانی میں بہہ گئی ہے
یہ میرے بچوں کے ازلی دشمن یہ حاکمانِ شبِ سیاہ ہیں
یہ میرے بچوں کا خون پی کے جو پَل رہے ہیں
یہ میرے شہروں کی روشنی کو نگل رہے ہیں
چراغِ شب کی تھرکتی لو بھی بجھا رہے ہیں
بنو اُمیہ سے اپنا رشتہ بتا رہے ہیں
سنو اے میرے وطن کے لوگو
درندوں کا یہ رزیل ٹولہ
جو اپنی دھرتی کے سارے لوگوں کو تہنا کر کے
مزے سے خود مغربی فضاؤں میں جھومتے ہیں
یہ بے عمل حاکمانِ شہرِ وفا پلٹ کے جو گھر کو آئیں
تو ان سے سارا حساب لینا
مجھے قسم ہے کہ کالے سانپوں یہ کریہہ المزاج ٹولہ
تمہارے ہاتھوں نہ بچ سکے گا
قسم ہے مجھکو سڑک پہ بہتے لہو کی سُن لو
چراغ اب تک لہو سے میرے جو جل رہا تھا
سحر کی زد میں وہ آ چکا ہے
بس ایک لمحے کا فاصلہ ہے
چراغ کی لو پھڑ پھڑا رہی ہے!۔