معروف شاعراور بزرگ عزادار جناب سید حسن سلمان رضوی صاحب 21 اگست2010 بمطابق شبِ 11 رمضان کو 80 سال کی عمر میں اسلام آباد میں انتقال فرما گئے۔ انا للہ وانا الیہ راجعون۔

ہفتہ کی رات بعد از افطار امریکہ سے آئے ہوئے اپنے چھوٹے فرزند کے ہمراہ گھر کے باہر چہل قدمی کے بعد طبیعت میں کچھ نا سازی محسوس کی۔ دمے کا ایک حملہ سانس لینے میں دشواری کا باعث بنا۔ ہسپتال پہنچ کر سانس کا تسلسل برقرار نہ رکھ سکے اور رات دس بجے داعیءاجل کو لبیک کہا۔ مرحوم کو بروز اتوار ایچ الیون اسلام آباد کے قبرستان میں سینکڑوں سوگواروں کی مو جودگی میں سپردِ خاک کر دیا گیا۔

مرحوم بہت بڑے شاعرِ اہلِ بیت (ع) تھے اور مرثیہ نگاری اور سلام گزاری میں اپنا ثانی نہیں رکھتے تھے۔ اسلام آباد کے ادبی، سماجی اورمذہبی حلقوں میں ایک نمایاں مقام رکھتے تھے۔ مرحوم کا شمار اسلام آباد کی عزاداری کی تاریخ کے بانیان میں ہوتا تھا۔ مجلسِ عزا کے آغاز میں سلام و مرثیہ پیش کرنا ہو یا اختتامِ مجلس پر پر سوز انداز میں زیارت تلاوت کرنا، مرحوم یہ سعادت بخوبی نبھاتے تھے۔ اس خطے میں برپا ہونے والی کوئی بھی مجلسِ عزا آپ کی شرکت اور سلام گزاری کے بغیر ادھوری تصور کی جاتی تھی۔ آپ ایک قادرالکلام شاعر ، ادیب اور کالم نویس تھے، جنکے حصے میں چھ ادبِ عالیہ اور پانچ ادبِ معلی کے پارہ ہائے ادب کی اشاعت کا اعزاز آیا ۔ آپکی تصانیف کی فہرست درجِ ذیل ہے۔

بارہ سلام
درد کے پھول
کربلا کے چراغ
خیرِ کثیر
حرفوں کا اجالا
تہنیت
استقامت
غم کی روشنی
شاعری سچ بولتی ہے
فارسی شکراست
قلم برداشتہ

یاد رہے کہ چند روز قبل یعنی یکم شعبان کو مرحوم کی اہلیہ بھی خالقِ حقیقی سے جا ملی تھیں ۔خدا وندِ حیی و قیوم سے دعا ہے کہ وہ مرحومین کو جوارِ معصومین (ع) میں جگہ عطا فرمائے، ان کے درجات کو بلند فرمائے اور پس ماندگان کو یہ عظیم دکھ، غمِ کربلا سے متصل کر کے صبرِ جمیل عطا فرمائے ۔

مرحوم کی مرحومین کے لئے ایک منظوم دعا پیشِ خدمت ہے، جو اب خود انکی مغفرت و بلندیءدرجات کے لئے باعثِ وسیلہ ہے۔

زہیر ابنِ قین ہوں، بریر ہوں، حبیب ہوں
ہم ان کے خانہ زاد ہوں تو کتنے خوش نصیب ہوں

ہر اک بزرگ شخص کی سوئے جناں روانگی
اسی غرض کے ساتھ ہے کہ ان کے ہم قریب ہوں

جوارِ سیدہ ملے، کنارِ سلسبیل ہو
شہیدِ کربلا ہوں صدر، بزم اک عجیب ہو

ولائے اہلبیت کی سروں پہ تمکنت لئے
ولایتِ امیر ہو، تو کیوں کوئی غریب ہو

یہ شعر خوانِ فاطمہ، امینِ امن و آشتی
یہ شاعری کی چھاوئں میں، لبیب ہو اریب ہو

اٹل ہے موت دوستو! تو حزن و خوف کس لئے
جیو تو اس طرح جیو کہ تمکنت نصیب ہو

خدا کرے کہ وحشتِ مزار خوابِ خوش بنے
سکونِ دائمی ملے، طمانیت نصیب ہو

عالمی اخبار کے مدیر اعلیٰ صفدر ھمدانی کے علاوہ تمام ادارتی بورڈ،قلم کاروں اور قارئین نے مرحوم کے انتقال پر انکے لواحقین سے اظہار تعزیت کرتے ہوئے دعا کی ہے کہ خالق موت و حیات انہیں جوار سید الشہدا میں جگہ دے۔