فرینکفرٹ(پریس ریلیز) جرمنی میں پاکستانی ،یورپی اورمقامی میڈیا کے نمائندوں نے اپنی پیشہ ورانہ تنظیم پاکستان جرمن پریس کلب قائم کرلی ہے ۔ہفتہ کو یہاںایک تاسیسی اجلاس میں جنگ گروپ کے نمائندے مظفر شیخ کو کلب کا پہلا صدر منتخب کیاگیا۔

 مرکزی کونسل کے لئے مندرجہ ذیل عہدیدارمنتخب ہوئے۔سیئنر نائب صدر سلیم پرویزبٹ (اے آر وائی گروپ)، نائب صدربرائے امورِیورپ سید اقبال حیدر(عالمی اخبارڈاٹ کام)،نائب صدر امورِپاکستان عطاالرحمان اشرف(روزنامہ اب تک)، جنرل سیکرٹری دانیال رضا(چنگاری ڈاٹ کام،طبقاتی جدوجہد)، اسسٹنٹ سیکرٹری جنرل نذر حسین(شان پاکستان ڈاٹ کام)، فنانس اور آفس سیکرٹری سیّد رضوان (شانِ پاکستان ٹی وی)،محمد اصغر مرزا(جائزہ انٹرنیشنل) ان کے معاون ہوںگے۔ تمام عہدیداروں کا انتخاب متفقہ طور پر ہوا۔

گزشتہ دو عام اجلاسوں اور طویل باہمی مشاورت کے بعدطے کئے گئے کلب کے اغراض ومقاصداور قواعدو ضوابط کی منظوری دی گئی ۔پریس کلب کی رجسٹریشن کے لئے ضروری کارروائی شروع کی جا رہی ہے ۔ملک بھرمیں مقامی، پاکستانی اور بین الاقوامی میڈیا کے نمائندوں کو پاکستان جرمن پریس کلب کی رُکنیت حاصل کرنے کی دعوت دی جائے گی۔ نومنتخب صدر مظفر شیخ نے کہا کہ اس کلب کے قیام کے اہم ترین مقاصد میں جرمنی میں پاکستانی میڈیاکو موئثر،مستحکم اور فعال بنانا ، میڈیاکے مختلف شعبوں میں نو واردوں کے لئے پیشہ ورانہ انداز میں کام کے لئے رہنمائی اور تربیت کا انتظام کرنا، میڈیا مالکان سے کام کی بہتر شرائط اور معاوضے طے کرنا، جرمن میڈیا اور مقامی پیشہ وارنہ تنظیموں کے ساتھ رابطے استوار کر کے اپنے فرائض کی انجام دہی کے لئے مساوی حقوق اور معلومات اور خبروں کے لئے مواد تک رسائی کی سہولتیں حاصل کرنا، جرمن میڈیا میں پاکستان کی نمائندگی کو موئثر اور پاکستان کے لئے مثبت بنانا، میڈیا میں کام کرنے والی پاکستانی تارکین وطن کی نئی نسل اور پاکستان و پاکستانی کمیونٹی کے درمیان روابط قائم کرنا،میڈیا کے ذریعے کمیونٹی کے مختلف حصوں میں باہمی برداشت اور تعاون کے فروغ کے لئے کام کرنااور کمیونٹی کے لئے پاکستان کے سفارتی اور دیگر اداروں کی کارکردگی کو بہتر بنانے میں مد ددینا شامل ہیں۔

پاکستان جرمن پریس کلب یورپ کے دوسرے ملکوں میں قائم پاکستانی میڈیاتنظیموں کے ساتھ قریبی تعاون اور مشترکہ سرگرمیوں کے لئے بھی کام کرے گا۔