مجھے اللہ کے آخری نبی کی عطا کردہ ایک نعت کے تین شعر یاد آ رہے ہیں اور یہی تین شعر آج کی اس تحریر کی تحریک بنے ہیں۔ یہ نعت رسول میں نے 1974میں لکھی تھی

اپنی اس تحریر کا عنوان میں نے جس مصرعے کو بنایا ہے وہ اللہ کے حبیب کے منتخب اور خالص نعت کے شاعر حفیظ تائب کی ایک نہایت مقبول نعت کا مصرعہ ہے جسے آگے چل کر مکمل آپکی خدمت میں پیش کر ؤنگا

یہ سب نعت بھی ہے،امت مسلمہ کا نوحہ بھی اور ایسے حالات کا مرثیہ بھی جو مسلم دنیا کے ننانوے فیصد عوام دشمن حاکموں کی وجہ سے اسلام کی بے عزتی اور مسلمانوں کے ساتھ حقارت کی وجہ بنے ہوئے ہیں۔ 

روز بروز مزید گہری ہوتی ہوئی ایک ایسی تاریکی ہے کہ ختم ہونے کا نام نہیں لیتی۔ جہل کے سائے میں اور عوام دشمنی کے منشور کی روشنی میں یہ مسلم حکومتیں اپنے ضمیر تو فروخت کر چکی ہیں بڑی طاقتوں خصوصی طور پر امریکہ کے ہاتھوں لیکن بیچارے بے زبان عوام کا بھی سودا کر چکی ہیں۔

اپنی حکومتوں کو قائم رکھنے کی خاطر ان ابرہہ صفت حاکموں نے امریکہ اور مغربی ممالک کا آنکھیں بند کر کے ساتھ دیا۔عراق کی اینٹ سے اینٹ بجوا دی، اکثر نے مسلمانوں کے ازلی دشمن اسرائیل کو تسلیم کر لیا، امریکہ،برطانیہ سے اربوں ڈالر کا اسلحہ خریدا اور اپنے عوام کو بھوکا مارا، اب ایران اور شام کو تباہ کروانے کے لیئے امریکی ایجنڈے کو خود اپنے ہاتھوں سے پورا کروا رہے ہیں۔ 

یہ بے غیرت حاکم نہ جانے اس بےضمیری اور نجس زبانوں سے کیسے عالمین کے لیئے رحمت نشان اللہ کے آخری نبی کا نام لیتے ہیں،درود پڑھتے ہیں اور میلاد کی محفلوں میں نعتوں پر مستی میں دیوانہ وار سر ہلاتے جیسے حضور کے دیوانے نظر آتے ہیں۔

مسلم معاشروں میں اب لگ بھگ ہر چیز جیسے روایت اور دکھاوا بن گیاہے۔ اللہ کے آخری نبی، وارث ختم نبوت، خِلق اول،خَلقِ اول، مزمل،مدثر،صادق،امین،یاسین،طہٰ اور ایسے ہی نورانی ناموں کے حامل نبی کا یوم ولادت بھی بس جیسے اب ایک روایت بن کے رہ گیا ہے جسکا کا عمل یا اس دن کی روح سے کوئی تعلق نظر نہیں آتا۔وہ ہستی جسے خالق کون و مکاں نے اپنا حبیب کہا اور جس کے لیئے عالمین خلق کیئے اور جسے عالمین کے لیئے رحمت بنایا، اس ہستی کا یوم ولادت مسلمان ملکوں اور مسلمانوں کی اکثریت کے ہاں بس ایک چھٹی کا دن بن گیا ہے یا پھر نعت کی چند محفلیں اور نیاز لنگر کی تقسیم، سرکاری درباری تقریبات میں اللہ اور اسکے آخری نبی کے فرمودات کی حکم عدولی کرنے والوں کی شرکت اورمیلاد نبی کے جلسوں کی صدارت علمائے حقہ کا لباس پہنے ہوئے علمائے سو کرتے نظر آتے ہیں۔ 

جلوسوں کے سامنے پھولوں کے ہار پہنے میلاد کی ریلیوں کی قیادت ایسے ایسے لوگ کر رہے ہوتے ہیں جنکی زندگیوں میں کہیں بھی ایمان اور دین رسول کی ایک جھلک نظر نہیں آتی۔

کیا حج کے موقع پر ، محرم کے ایام میں یا پھر اللہ کے حبیب کے یوم ولادت پر ہم اپنے گریبانوں میں جھانکنے کی زحمت کریں گے کہ کیا ہم انفرادی طور پر اور مسلم امہ کے طور پر اسلام اور اللہ کے آخری نبی کے نام کی لاج رکھنے والے ہیں یا پھر شرمندگی کا باعث ہیں۔ 

ہم اگر سال میں اسی ایک دن کے موقع پر ہی اپنا احتساب کر لیں تو زندگی کی کتنی ہی تاریک راہیں روشن ہو جائیں۔ کبھی کیا آپ نے یہ سوچا کہ چودہ سو سال پہلے اللہ کے حبیب نے جن کافر عربوں کے درمیان اپنی زندگی کے اہم ترین چالیس سال گزارے انہوں نے آپ سرکار کی ایسی تکریم کی کہ کبھی حضور کا نام لیکر انہیں مخاطب نہیں کیا بلکہ جب بھی کہا انکے کردار اور وصف کی مناسبت سے فقط یا صادق کہا یا امین کہا۔ اور اللہ کے حبیب نے خود اس دور کے کافروں کو بھی کافر نہیں کہا بلکہ اپنے کردار سے انکے دلوں میں اسلام کا نور اتارا اور انہیں دین حقہ کی جانب بلایا۔

آج اللہ کے اس حبیب کی امت کا حال کیا ہےِ حفیظ تائب کا یہ مصرعہ اس کا سچا عکاس ہے۔۔۔۔اے نوید مسیحا تیری قوم کا حال موسیٰ کی بھیڑوں سے ابتر ہوا۔۔۔مسلمان ہی مسلمان کا دشمن ہے۔ اسلام کا نام لینے والے غیر مسلموں سے بھی اخلاق کے معاملے میں بدتر ہیں۔ یہ جس نبی کی امت ہیں وہ معلم اخلاق تھا اور یہ امت جیسے اخلاقی طور پر دیوالیہ ہو چکی ہے۔

اسلام جس نے ایک جان کے زیاں کو ایک قوم کا زیاں قرار دیا تھا اُس اسلام کا نام لینے والی حکومتیں خود اپنی رعایا کے ساتھ کیا سلوک کر رہی ہیں یہ سوچ کر بھی نفرت ہوتی ہے۔ جن ملکوں میں اللہ کے گھر کے نام سے موسوم مساجد اور عزا خانے محفوظ نہ ہوں وہاں عام گلی محلے کیا محفوظ ہو نگے۔ حاکم اپنے ایوانوں میں بدمست ہیں اور عوام سڑکوں پر بے آبرو

مسلمان جو کام سب سے آسانی سے اور بے خوف ہو کر کر رہا ہے وہ دوسرے مسلمان کو کافر قرار دینا ہے۔ ایک مسلمان اسلام کے نام پر ہی دوسرے مسلمان کا گلا کاٹ رہا ہے،مسجد ومنبر نوے فیصد تجارت بن گیا ہے اور جہالت کے نمائیندے مسجد ومحراب و منبر کو اپنے ذاتی مقاصد اور مالی منفعت کے لیئے استعمال کر رہے ہیں، مسجد و منبر کو گروی رکھنے والا بدکردار ملاں خود کو اسلام کا نمائیندہ اور مسلمان کا رہنما کہتا ہے

بے حیائی کو حیا کانام دیا جاتا ہے۔ منبروں پر اداکاری ہوتی ہے، اللہ کے دین کو خوب خوب بیچا جاتا ہے، اپنے مقاصد کے لیئے جھوٹی حدیثیں گھڑی جا تی ہیں، خوف خدا جیسے قصہ پارینہ بن چکا ہے، نظام اسلام کا شور مچانے والے خود پر اس نظام کو لاگو کرنے سے عاری ہیں ، عزتوں کے جیسے جنازے نکل گئے ہیں، اہل علم گھروں میں مقید ہیں اور جاہل و بے عمل ان پر حکمران ہیں،دین کی قیادت بے عمل کے ہاتھ میں ہے۔ اور اس پر بھی انکو یہ زعم ہے کہ روز محشر اللہ کے حبیب انکی شفاعت کریں گے۔

اللہ بے شک غفور الرحیم ہے لیکن مسلمان شاید اللہ کی رحمت اور غفاریت کا امتحان لینا چاہتا ہے۔

ہمارے گناہوں کی فہرست ایسی طویل اور گھناؤنی ہے کہ جہنم بھی ہمارے لیئے انعام ہو گا سزا نہیں۔ ہم نے کلمہ پڑھ کر کلمہ گو کو قتل کیا ہے، ہم نے اسلام کے چہرے کو مسخ کیا ہے۔ہم نے حضور کو بھی ایک شخصیت سمجھ کر پوجا ہے انکے کردار کو اپنی روح میں نہیں اتارا۔

ایسے ماحول میں ذرا مرحوم حفیظ تائب جنت مکانی کی یہ نعت پڑھیئے جو نوحہ بھی ہے اور نہ بدلنے والے حالات کا مرثیہ بھی۔