جرمنی کے شہر فرینکفرٹ میں پاک یورو جرنلسٹس کا ایک اہم اجلاس ہوا جسکی صدارت لندن سے تشریف لائے فورم کے چیئرمین اور عالمی اخبار کے مدیر اعلیٰ صفدر ھمدانی نے کی اور اس اجلاس میں پاک یورو جرنلسٹس فورم کے نائب چیئرمین ارشاد ہاشمی،صدر دانیال رضا،نائب صدر برائے جرمنی طاہر ملک نے شرکت کی جبکہ دیگر ممالک کے منتخب نائب صدور سے بذریعہ ٹیلی فون مشاورت ہوئی۔ جناب سید سعید نے اجلاس میں مبصر کے طور پر شرکت کی

فورم کے چیئرمین صفدر ھمدانی نے فن و ادب ایسوسی ایشن اور پاک یورو جرنلسٹس فورم کے اشتراک سے ہونے والی ہفتہ پچیس اگست کی کامیاب تقریب پر جناب ارشاد ہاشمی،دانیال رضا اور طاہر ملک کو مبارکباد دی اور اس امر پر مسرت کا اظہار کیا کہ پاکستانی برادری میں نفاق ڈالنے والے عناصر کی کوششوں کے باوجود مزکورہ تقریب نہایت کامیاب رہی اور اسمیں فرینکفرٹ کے علاوہ دوسرے شہروں سے بھی بڑی تعداد میں افراد نے شرکت کی۔ انہوں نے کہا کہ مستقبل میں بھی فورم دیگر ہم خیال تنظیموں کے ساتھ مل کر ایسی ہی معیاری تقاریب منعقد کرے گا

اجلاس کے شرکا نے اس امر پر افسوس کا اظہار کیا کہ صحافت کے نام پر قائم ہونے والی ایک تنظیم کے عہدیداروں نے پچیس اگست کی تقریب کو ناکام بنانے کے لیئے نہایت سطحی اور غیر اخلاقی ہتھکنڈے استعمال کیئے اور مرحوم صالح جی کی یاد میں ہونے والے ریفرنس میں لوگوں کو شرکت سے منع کرنے کے لیئے ٹیلی فون کے ذریعے لوگوں کو گمراہ کرنے کی کوشش کی لیکن انکے یہ منفی اقدامات ناکام رہے اور تقریب میں سو سے زائد افراد نے شرکت کی۔

پاک یورو جرنلسٹس فورم کے عہدیداروں نے یورپ کے دیگرممالک کے عہدیداروں سے ٹیلی فون پر مشورے کے بعد یہ طے کیا کہ ایسے افراد اور تنظیموں کو آئیندہ سے انکی منفی حرکتوں کا منہہ توڑ جواب دیا جائے گا اور انہیں پاکستانی کیمونٹی کے سامنے ننگا کیا جائے گا کہ ایسے لوگ کس طرح پاکستانی برادری میں منافرت اور تقسیم کی کوششییں کرتے ہیں

فورم کے اجلاس میں مستقبل کے چند نئے منصوبوں پر بھی تبادلہ خیال کیا گیا اور طے پایا کہ جلد ہی ان منصوبوں اور تقاریب کی تفصیل کا اعلان کیا جائے گا

اس موقع پر فورم کے مرکزی عہدیہداروں نے ایک قرار داد کے ذریعے جرمنی میں پاکستان کے سفارتخانے کو باور کروایا کہ وہ صحافتی تنظیموں کے ساتھ یکساں سلوک نہیں کر رہے اور پیشہ ور صحافیوں کی بجائے اپنے مقاصد کے لیئے نام نہاد صحافتی تنظیموں کی کھل کر پشت پناہی کر رہے ہیں جو اس بنیادی فلسفے کے خلاف ہے کہ کوئی بھی سفارتخانہ تمام ہم وطنوں کے لیئے یکساں ہوتا ہے
قرارداد میں جرمنی میں نومتعین سفیر پاکستان جناب عبدالباسط کو اس طرف توجہ دینے کی درخواست کی گئی ہے اور اس بات پر زور دیا گیا ہے کہ وہ پریس کے شعبے کو ہدایت دیں کہ تمام صحافتی تنظیموں سے یکساں سلوک کیا جائے اورذاتی تعلقات کو قومی مفادات پر ترجیح نہ دی جائے۔

پاک یورو جرنلسٹس فورم کے اجلاس میں یورپی ممالک کی سطح پر خبروں کے تبادلےاور ایک دوسرے ملک کی خبروں کو اپنی ویب سائٹوں پر شائع کرنے اور دیگر برقی اخبارات پر شائع کروانے کے سلسلے میں یونان کے سکندر ریاض چوہان اور فرانس پیرس کے میاں امجد کی کوششوں اور اشتراک کی تعریف کی گئی اور انکا بطور خاص شکریہ ادا کیا گیا

اجلاس کے شرکا نے یہ بھی طے کیا کہ صحافت کے نام پر ذاتی تجارت کرنے والے اور کسی صحافتی تعلیم و تجربے کے بغیر خود کو سفارتخانوں میں صحافی ظاہر کرنے والے افراد کو صحافتی برادری کے سامنے ظاہر کیا جائے اور ایسے افراد کی حوصلہ شکنی کے اقدامات کیئے جائیں تا کہ کم از کم یورپ کی سطح پر دو نمبر نام نہاد صحافیوں کو طشت از بام کیا جائے