گزشتہ کئی برسوں کی طرح اس سال بھی چوبیس جنوری بروز ہفتہ لندن کی کاروباری،دینی اور سماجی شخصیت اصغر کرمانی اور انکی اہلیہ نفیسہ کرمانی نے اپنے گھر پر رامفورڈ لندن ایسیکس میں مجلس شہدائے کربلا کا اہتمام کیا جس میں خاصی تعداد میں مومنین و مومنات نے شرکت کی اور مجلس عزا کے اختتام پر نیاز مولا عباس ع پیش کی گئی۔

اس مقدس محفل کی نظامت ذوالقرنین حیدر نے کی اور اس مجلس عزا کو ماتمداری ڈاٹ کام کے اشتیاق ڈائیک کے تعاون سے دنیا بھر کے متعدد ممالک میں براہ راست وڈیو ٹیلی کاسٹ بھی کیا گیا۔

اس مجلس عزا میں رضا کرمانی اور اصغر کرمانی کے علاوہ جن عشاق اہلبیت نے سوز و سلام و منقبت کا نذرانہ پیش کیا انکے اسمائے گرامی ہیں۔خاقان عباس۔ ظفر حسین۔ غلام نبی۔ علی حیسن۔عامر قومی۔وجاہت حسین۔ اشتیاق حسین،شاہد حسین، حافظ انیس و دبیر جناب ابوتیمور اور مرثیہ نگار صفدر ھمٰٰدانی۔

جناب ابوتیمور نے اپنے مخصوص انداز میں انیس و دبیر و جوش کا کلام پیش کیا اور محفل کو گرمایا۔

اس موقع پر سید اصغر کرمانی اور انکی اہلیہ کے مرحومین کے علاوہ تما حاضرین،مومنین و مومنات اور مسلمین و مسلمات بالخصوص اصغر کرمانی کی دادای شیریں بائی ناصر کی مغفرت اور بلند درجات کے لیئے سورہ فاتحہ تلاوت کی گئی۔

معروف شاعر،ادیب،براڈکاسٹر ،محقق اور عہد حاضر کے منفرد مرثیہ نگار صفدر ھمٰدانی نے ‘‘عزاداری‘‘ کے موضوع پر نہایت فکر انگیز مرثیہ نوتصنیف پڑھا اور اپنے خطاب میں اس بات پر زور دیا کہ ہمیں مسلمان اور علی ابن ابی طالب کے ماننے والے کی حیثیت سے اپنے علم اور مطالعے میں اضافہ کرنا چاہیئے اور ملائیت سے خود کو محفوظ رکھنا چاہیئے کیونکہ مجالس عزا میں ایک طبقے کے کمرشل ازم کی وجہ سے مجالس کی روح کو نقصان پہنچا ہے۔ انہوں نے کہا کہ ضرورت اس امر کی ہے کہ مرثیہ جو اہلبیت کی مقبول ترین صنف ہے اسکے احیا کی طرف توجہ کی جائے ورنہ اس فن کے مر جانے کے گناہگار ہم خود ہونگے۔

اپنے مرثیہ نوتصنیف ‘‘عزاداری‘‘ میں مرثیہ نگار صفدر ھمٰٰدانی نے عزاداری کی اہمیت اور افادیت پر زور دیا اور یہ بتایا کہ یہ عزاداری حسین ہر دور کے ظالم کے منہہ پر طمانچہ ہے اور یزیدیت کی رسوائی کا اعلان ہے۔

چار گھنٹے تک جاری رہنے والی اس مجلس کے اختتام پرنوحہ و ماتم کے بعد نیاز پیش کی گئی اور اصغر کرمانی نے تمام حاضرین اور پڑھنے
والوں کا شکریہ ادا کیا۔