لندن سے تشریف لائے شاعر،ادیب۔محقق۔استاد۔کالم نگار اور عالمی اخبار کے مدیر اعلیٰ سید صفدر ھمدانی ان دنوں آسٹریلیا کے دورے پر ہیں۔ انکے دورے کا آغاز برسبین میں فاطمہ زہرا اسلامک سینتڑ میں مجالس محرم الحرام سے ہوا تھا جسکے بعد وہ سڈنی تشریف لائے جہاں یکم دسمبر کو انہوں نے سڈنی میں ڈاکٹر نگہت نسیم کی تین کتابوں کی رسم اجرا میں صدارت کی اور دو دسمبر کو صدائے وطن کے مدیر اعلیٰ سید ظفر حسین کے دولت کدے پر مجلس عزا سے خطاب کیا

انکی متعدد دیگر ادبی۔نشریاتی اور دینی مصروفیات میں سے ایک اہم مصروفیت جمعہ سات دسمبر کو آسٹریلیا کے شہر کینبرا میں ہونے والی ایک اہم ادبی اور فکری نشست ہوئی جس میں کینبرا اور سڈنی کے منتخب شعرا اور صاحبان فکر نے شرکت کی۔اسی تقریب میں سڈنی کے بعد کینبرا میں ڈاکٹر نگہت نسیم کی تینوں کتابوں کی رسم اجرا ہوئی۔
 اس تقریب کا اہتمام کینبرا کی ادبی تنظیم  بزم ادب کینبرا  کے روح رواں جناب محمد علی نے کیا ہے اور میزبان جناب تنویر اور انکی اہلیہ انیس تنویر تھیں۔تقریب کی صدارت مفکر اہلبیت صفدر ھمدانی نے کی جبکہ مہمان خصوصی ڈپٹی ہائی کمشنر جناب تصور خان تھے۔ تقریب کے پہلے حصے میں ڈاکٹر نگہت نسیم کی تین کتابوں کی رونمائی سڈنی کے بعد کینبرا میں ہوئی۔ اس حصے میں جناب محمد علی، ڈاکٹر نگہت نسیم،جناب تصور خان اور جناب صفدر ھمدانی نے اظہار خیال کیا۔
تقریب کے پہلے حصے کے بعد میزبانوں کی طرف سے پر تکلف عشایئے کا اہتمام کیا گیا تھا جسکے بعد دوسرا حصہ مشاعرے اور ڈاکٹر نگہت کی کتابوں سے اقتباسات پڑھنے کا تھا۔ اس حصے میں جناب محمد علی۔جناب عتیق۔جناب تصور خان۔نگہت نسیم،انیس صاحبہ اور محترمہ سحر کے بعد جناب صفدر ھمدانی نے اپنا کلام سنایا

اس تقریب کی تفصیلی رپورٹ جلد ہی پیش کی جائے گی

صفدر ھمدانی کینبرا کی اس تقریب کے بعد ہفتہ آٹھ دسمبر کو سڈنی سے براستہ کوالالمپور لندن کے لیئے روانہ ہو رہے ہیں