‎اردو نے نئی ٹکنالوجی کے ساتھ  جس سفر کا آغاز کیا ہے اس نے اردو اسلوب کو ایک نئی جہت عطا کی ہے ۔ اردو میں ادب کی تخلیق سے اب تک  پیرایہ ٴ اظہار کے رنگا رنگ انداز و اسالیب ملتے ہیں۔ کبھی مفرس اور معرب زبان اور مقفی و مسجع عبارت آرئی اور پُر تکلف انداز بیان اردو کا اہم اسلوب رہا تو کبھی سہل و سلیس  اور بے تکلف انداز  نے اپنی جگہ بنائی ۔  اسی عہد میں غالب کے خطوط کو بہت مقبولیت ملی کیونکہ غالب نے براہ راست اور بے تکلف اظہار کو اپنے خطوط میں جگہ دی او ر مراسلے کو مکالمہ بنا دیا ۔اب انٹر نیٹ بالخصوص بلاگ  کی تحریروں نے اسے ایک قدم آگے بڑھاتے ہوئے اسے واقعی گفتگو کا انداز عطا کر دی ہے ۔

‎بلاگ کی تحریروں کی سب بڑی خوبی یہ ہے کہ یہ خط کی طرح محض دو لوگوں  کے درمیان گفتگو نہیں ہے بلکہ یہ ایک مذاکرے کی شکل رکھتا ہے جس گفتگو میں بیک وقت کئی لوگ شریک ہوسکتے ہیں اور اس کی سب سے بڑی خوبی یہ ہے  کہ اس مذاکرے میں دنیا کے کسی بھی گوشے میں بیٹھے لوگ اس میں شریک ہوسکتے ہیں ۔

‎اب تک چند لوگوں نے ہی اس جانب توجہ دی ہے لیکن انھوں نے بھی اپنے  مضامین میں ضمنی طور پر اس کا تذکرہ کیا ہے ۔  اس سلسلے میں ڈائریکٹر قومی کونسل برائے فروغ اردو زبان ، وزرات برائے فروغ انسانی وسائل حکومت ہند ، اور جواہر لعل نہرو یونیورسٹی ، نئی دہلی کے ایسوسی ایٹ پروفیسر ڈاکٹر خواجہ اکرام پہل کرتے ہوئے بلاگ کی بعض تحریروں کو اپنی  کتاب  “ اردو زبان کے تیکنکی وسائل اور امکانات “ میں شامل کر کے اس نئے اسلوب کو متعارف کرانے کی کامیاب کوشش  کی ہے ۔

‎انہوں نے اس کتاب میں صرف’ عالمی اخبار‘  اور “اردو نیٹ جاپان “  کے نہ صرف بلاگز شامل ہیں بلکہ اس  نایاب کتاب کا انتساب انہی دو اخبارات کے نام ہیں  ۔ کیونکہ عالمی اخبار اور اردو نیٹ جاپان  اردو کے  بڑے آن لائن اخبارات ہیں جو اردو کی خدمت انجام دے رہے ہیں اور اردو کے سرمائے میں ایک نئے ذخیرے کا اضافہ کر رہے ہیں ۔ یہ کتاب ہندوستان اور پاکستان میں ایک ساتھ شائع ہوئی ہے ۔ اس کتاب کو ہندوستان ، نئی دہلی  کے وزیر جناب کپل سبل صاحب ایک بڑے جلسے میں افتتاح کریں گے جسے ہندستان کا تمام میڈیا کور کرے گا۔

‎ڈاکٹر خواجہ اکرام کی  کتاب میں عالمی اخبار کےجن بلاگ کو شامل کیا ہے وہ یہ ہیں ۔
‎1.    مراسلہ نگاری بمقابلہ بلاگ نگاری
‎2.    اپنے دم پر رواں ہے اردو
‎3.    تعمیل حکم
‎4.    شاعری میں محاوروں کا استعمال
‎5.    نئے سال کا جشن کیوں منائیں ؟

‎عالمی اخبار کا اداراہ ، قلمکار ، قارئیں ڈاکٹر خواجہ اکرام کو ان کی کتاب “ اردو زبان کے تیکنکی وسائل اور امکانات “ پر دلی مبارکباد پیش کرتے ہیں