کراچی میں دھماکے پر حکومت سندھ اور پنجاب یوم سوگ منا رہی ہیں ،سندھ میں سرکاری عمارتوں پر قومی پرچم سرنگوں ہے،سانحہ عباس ٹاون کے خلاف تجارتی و کاروباری مراکز ،تعلیمی ادارے اور ٹرانسپورٹ مکمل طور پر بند ہے۔

حکومت سندھ اور سیاسی و مذہبی جماعتوں کی جانب سے عباس ٹاؤن بم دھماکوں میں قیمتی جانوں کے ضیاع پر گہرے دکھ کا اظہار کیا۔حکومت کے اعلان پر صوبے میں یوم سوگ اور سرکاری عمارتوں پر پرچم سرنگوں ہے۔سندھ اسمبلی میں آج ہونے والا اجلاس بھی ملتوی کر دیا گیا ہے۔

کراچی دھماکے پر پنجاب حکومت، ایم کیو ایم، اے این پی ، سنی اتحاد کونسل،سنی تحریک ،مسلم لیگ فنکشنل،مسلم لیگ ن سمیت دیگر سیاسی جماعتیں بھی یوم سوگ منا رہی ہیں۔شیعہ علما کونسل، جعفریہ الائنس پاکستان اور مجلس وحدت المسلمین نے تین روز سوگ اور شہر میں امن ہڑتال کا اعلان کر رکھا ہے۔تاجر برادری ، پبلک اور گڈز ٹرانسپورٹ تنظیموں اور رکشہ ٹیکسی ایسو سی ایشن اور وکلا بھی متاثرین سے اظہار یکجہتی کیلئے ہڑتال کر رہے ہیں۔

یوم سوگ اور ہڑتال کے باعث سندھ میں تمام سرکاری و نجی تعلیمی ادارے بند ہیں۔حیدر آباد کی سندھ یونیورسٹی نے بھی تعلیمی سرگرمیاں معطل کر رکھی ہیں۔پاکستان بار کونسل کے اپیل پر وکلا نے ملک بھر کی عدالتوں کا بائیکاٹ کر دیا ہے۔