پاکستان کے مقبول اور منفرد اداکار علاﺅالدین کی اکتیسویں برسی گزر گئی 

علاﺅ الدین 10 دسمبر 1920ءکو راولپنڈی میں پیدا ہوئے تھے۔ ابتدا میں انہوں نے گلوکاری کے میدان میں قسمت آزائی کرنی چاہی مگر ان کی فلمی زندگی کا آغاز سے اداکاری سے ہوا اور یہی شعبہ ان کی پہچان بن گیا۔

علاﺅ الدین نے اپنی فنی زندگی کا آغاز ممبئی سے کیا اور وہاں سنجوگ، نمستے، لیلیٰ مجنوں اور میلہ میں کام کیا۔ قیام پاکستان کے بعد وہ پاکستان آگئے جہاں ان کی پہلی فلم پھیرے تھی۔ اس کے بعد انہوں نے شہری بابو، محبوبہ، محل، انوکھی، وعدہ، انتقام، پاٹے خان، پینگاں، مرزا صاحباں، حمیدہ، آدمی، مجرم اور متعدد دوسری فلموں میں کام کیا تاہم فلم کرتار سنگھ کے ٹائٹل رول میں تو انہوں نے اداکاری کی انتہا کو چھولیا۔ 

اس کے بعد مہتاب اور بدنام میں ادا کئے ہوئے کرداران کی پہچان بنے۔ اداکارعلاﺅ الدین نے مجموعی طور پر 319 فلموں میں کام کیا جن میں سے 194 فلمیں اردو میں اور 125 فلمیں پنجابی میں بنائی گئی تھیں۔ علاﺅ الدین نے مجموعی طور پر آٹھ مرتبہ نگار ایوارڈ حاصل کیا۔ انہیں ”پاکستان کا عوامی اداکار“ کہا جاتا تھا۔علاﺅالدین 13 مئی 1983ءکولاہور میں وفات پاگئے اور گلبرگ کے قبرستان میں آسودہ خاک ہوئے