مڈغاسکر کی باسی سربطخ کے بارے میں خدشہ ہے کہ اگر اس کی افزائش کے لئے نیا علاقہ نہ ڈھونڈا گیا تو اس کی نسل معدوم ہو جائے گی۔ یہ بات ایک نئی تحقیق سے سامنے آئی ہے جس میں کہا گیا ہے کہ اس پرندے کے چھیانوے فیصد چوزے دو سے تین ہفتے کی عمر میں ہلاک ہو جاتے ہیں۔

جنگلی حیات کے تحفظ کے کارکنوں کا کہنا ہے کہ انسانی سرگرمیوں نے اس پرندے کو ایک دلدلی علاقے تک محدود کر دیا ہے لیکن وہاں بھی اس کے لیے کافی خوراک موجود نہیں ہے۔ تحقیق کرنے والے ادارے نے اندازہ لگایا ہے کہ اس نسل کے صرف پچیس پرندے باقی بچے ہیں۔ مذکورہ بالا انسانی سرگرمیوں میں جنگلات کا خاتمہ، زراعت اور ماہی گیری شامل ہیں اور انھوں نے قدرتی ماحول کو اس قدر تباہ کر دیا ہے کہ سربطخ اب شمال مشرقی مڈغاسکر کے ایک چھوٹے سے دلدلی علاقے تک محدود ہو کر رہ گئی ہے۔

سائنس دانوں نے پتہ چلایا کہ چوزے خوراک کی کمی کی وجہ سے ہلاک ہو رہے ہیں۔ یہ بطخیں جھیلوں کی تہہ سے خوراک حاصل کرتی ہیں، لیکن اس علاقے میں پائی جانے والی جھیلیں ان کے لیے بہت گہری تھیں۔ تاہم سائنس دانوں کا کہنا ہے کہ اگر اس پرندے کو کوئی نیا گھر تلاش کر کے دے دیا جائے تو یہ دوبارہ پھل پھول سکتا ہے۔