گزشتہ بارہویں قسط میں بات یہاں تک پہنچی تھی کہ‘‘ان تخلیقات سے بخوبی اندازہ لگایا جا سکتا ہے کہ بر صغیر سے باہر تخلیق پانیوالا اردو ادب کیا مزاج رکھتا ہے اور اردو لکھاری کیا سوچتے ہیں‘‘۔

محترم نصر ملک نے اپنی اس تحقیق میں لکھا ہے کہ ‘‘شمالی مغربی یورپ میں اردو کے احیاء اور شمالی امریکہ میں اردو کی آبیاری بارے جستجو کرنیوالوں کے لیے یہ کتاب ’’شناخت کی تلاش‘‘ ایک دستاویزی حیثیت رکھتی ہے اور اسے سائیں سُچّا نے مرتب کیا ہے۔ اور اسے سویڈن میں اردو کی کتابیں شایع کرنےوالے ادارے کتابیات کے بعد دوسرے ادارے ’’ودیاں کتاباں‘‘ نے ’’انشاء پبلی کیشنز‘ کلکتہ سے چھپوا کر سٹاک ہالم سے جاری کیا ہے۔

سائیں سچا‘ اردو‘ پنجابی ، سویڈش اور انگریزی چاروں زبانوں میں لکھتے ہیں اور ان کی اردو کتابوں ’’چٹکیاں اور سوچیں (افسانوں کے مجموعے) سویڈن ہی سے طبع ہوئی ہیں۔ ’’ودیا کتاباں‘‘ کی اپنی ایک اردو ویب سائٹ بھی ہے جو سویڈن میں اردو ادب بارے میں اچھی معلومات مہیا کرتی ہے۔ اس کا ایڈریش www.vudya.com ہے۔ اور اسے سائیں سُچّا ہی ترتیب دیتے ہیں۔

عرفان ملک جب تک سٹاک ہالم میں رہے اردو اور پنجابی زبانوںمیں ان کی تخلیقات شایع ہوتی رہیں ۔ سویڈن سے انہوں نے’’گھونگھے‘‘ کے نام سے سویڈش لکھاریوں کی تخلیقات کا اردو میں ترجمہ کر کے ایک ’’انتھیالوجی‘‘ شایع کرائی اور اس طرح اردو کی دنیا میں سویڈش ادب نے پہلی بار راہ پائی۔

پنجابی (اردو رسم الخط) میں عرفان ملک کی شاعری کی ایک کتاب ’’وچ جگراتے سُتّی تان‘‘ بھی سویڈن ہی سے ودیا کتاباں نے شایع کیں۔ سٹاک ہالم میں احمد فقیہہ ترقی پسند نظریات رکھنے والا ایک منفرد شاعر ہے۔ اور کسی تعارف کا محتاج نہیں۔ اس نے ہر صنعف میں شاعری کی ہے ۔ لیکن نظم میں اس کا اپنا ایک مقام ہے ۔ ابھی حال ہی میں اس کی دو کتابیں منظر پر آئی ہیں اوّل ’’ڈھیر زرد پتوں کا‘‘ اور دوئم ’’ شہر افسوس میں‘‘

دین چوھدری نے  سٹاک ہالم سے ’’اردوانگلش سویڈش لغت‘‘ شایع کی ہے جو اپنی نوعیت میں اردوداں طبقے کے استفادے کے لیے ایک گرانقدر کوشش ہے۔ سٹاک ہالم ہی سے جمیل احسن نے ایک اردو سہ ماہی جریدہ ’’منزل‘‘ شروع کر رکھا ہے ۔ منزل ملتان پاکستان سے شایع ہوتا ہے اور یہ پاکستانی اخبارات کے تراشوں اور جمیل احسن اور ان کی ایشین اردو سوسایٹی سٹاک ہالم میں شامل شعراء کی تخلیات سے ترتیب پاتا ہے ۔ جمیل احسن کی اردو شاعری کے اپنے پانچ مجموعے شایع ہو چکے ہیں ۔

سویڈن کے خوبصورت صنعتی شہر گو تنبورگ سے امجد شیخ نے اردو دنیا کے لیے ایک بالکل منفرد ویب سائٹ شروع کر رکھی ہے (امجد شیخ  عالمی اخبار کی مجلس ادارت کے رکن ہیں اور تکنیکی امور کے مدیر ہیں)۔.urdulife.com  کے نام سے یہ ویب سائٹ اردو ادب کے فروغ کے لیے دنیا بھر میں پھیلے ہوئے اردو لکھاریوں کو ایک پلیٹ فارم سے اپنی تخلیقات پیش کرنے کا موقع مہیا کرتی ہے اور امجد شیخ کی کوششیں خوب رنگ لا رہی ہیں۔ اس سایٹ پر اردو شعراء کا کلام خود ان کی زبانی بھی سنا جا سکتا ہے اور پڑھا بھی جا سکتا ہے۔ اس سایٹ پر یورپی اور دیگر زبانوں کے ادب کو اردو میں ترجمہ کرکے پیش کرنے کا بطور خاص بندوبست کیا گیا ہے۔ صرف یہی نہیں بلکہ اردو دنیا کی ویب سائٹس میں www. urdulife.com پہلی سائٹ ہے جو اپنے قارئین کو اردو زبان میں براہ راست بغیر کسی مشکل کے ’’ای‘ میل‘‘ لکھنے اور بجھوانے کی سہولت مہیا کرتی ہے اور یہ امجد شیخ کا اپنا کارنامہ اور ایک ایسا اعزاز ہے جو اردو دنیا پر ایک احسان سے کم نہیں۔ اے کاش پاکستان کی انجمن ترقی اردو اس طرف توجہ دے۔اسی طرح سویڈن کے جنوبی شہر لُنڈ سے زبیر وارثی اردو ادب کے فروغ کے لیے متحرک ہیں ۔

ان معلومات کو آپ تک پہنچانے کے لیئے میں آخر میں ایک بار پھر ڈنمارک میں مقیم ادیب ،شاعر اور محقق جناب نصر ملک کا شکریہ ادا کرتا ہوں۔

میں نے سویڈن میں پاکستانیوں کی تنظیم ‘‘فرینا دے پاکستانیر ای بت شرکہ ‘‘ کی فکری نشست اور مشاعرے کی بات کی تھی۔

برادرم سائیں رحمت علی نے اس دو رخی تقریب کی رپورٹ دو فروری 2009کو عالمی اخبار کے لیئے لکھی تھی جسے من و عن آپکے خدمت میں پیش کرتا ہوں۔