آسٹریلیا کے شہر سڈنی سے لندن کے نجی دورے پر تشریف لائی ہوئی افسانہ نویس اور عالمی اخبار کی نائب مدیر اعلیٰ ڈاکٹر نگہت نسیم کے اعزاز میں عالمی اخبار کے مدیر اعلیٰ صفدر ھمٰدانی اور انکی اہلیہ ماہ پارہ صفدر نے ایک عشائیے کا اہتمام کیا جس میں چنیدہ افراد نے شرکت کی۔

اس عشایئے میں عالمی اخبار کے معاون مدیر اعلیٰ معروف سینئر صحافی آصف جیلانی اور انکی اہلیہ معروف افسانہ نویس محسنہ جیلانی،شاعرہ اور ٹی وی اینکر نرگس جمال،معروف شاعر،صحافی اور ٹی وی میزبان فیضان عارف،شاعرہ سائرہ بتول اور انکے شوہر مجاہد،اصغر کرمانی اور انکی اہلیہ نفیسہ کے علاوہ نگہت نسیم کے بھائی عاصم نسیم،بیٹی آمنہ اور بھتیجی فاطمہ نے بھی شرکت کی۔

عشایئے کے دوران اور اسکے بعد بھی نشریاتی،صحافتی اور ادبی موضوعات پر شرکا کی گفتگو جاری رہی۔

ڈاکٹر نگہت نیسم نے لندن میں عالمی اخبار کے مدیر اعلیٰ صفدر ھمٰدانی کی بیٹی زہرا صفدر اور داماد ندیم زیدی کی دعوت ولیمہ میں بھی شرکت کی۔


اسی دوران نگہت نسیم کے افسانوں کے دوسرے مجموعے ''مٹی کا سفر‘‘ کی تقریب رونمائی کا اہتمام ڈاکٹر نگہت نسیم کے لندن میں مقیم اہل خانہ نے خاندان کے بزرگ اور ڈاکٹر نگہت کے والد محمد احمد نسیم اشرفی کی قیادت میں کیا ہے۔

تقریب کی رونمائی 22اپریل 2009 کو بدھ کے روز شام چھ بجے لاہوری گرِل ہال 427ہائی سٹریٹ نارتھ مینر پارک میں ہو گی جسکی صدارت  معروف افسانہ نگار محسنہ جیلانی کریں گی اور مہمان خصوصی شاعر،ادیب،صحافی اور براڈکاسٹر صفدر ھمٰدانی ہوں گے

تقریب کی نظامت معروف شاعر،صحافی اور لندن کے وینس ٹی وی کے اینکر فیضان عارف کریں گے۔

ڈاکٹر نگہت نسیم کی شخصیت اور انکے فنی سفر کے بارے میں اظہار خیال کرنے والوں میں محمد نسیم احمد اشرفی،بانو ارشد،آصف جیلانی،سائرہ بتول،عبیدہ سید،نرگس جمال۔سیمیں برلاس،اسمارا عاصم،نادیہ نسیم،افضال نسیم شامل ہیں۔

اسموقع پر ڈاکٹر نگہت نسیم مہمانوں کا شکریہ ادا کرنے کے علاوہ اپنے خیالات کا اظہار بھی کریں گی اور اپنی پنسد کے ایک افسانے کا اقتباس ڈرامائی طور پر پڑھ کر سنائیں گی۔

اس تقریب رونمائی میں ادیبوں اور شاعروں کے علاوہ زندگی کے مختلف شعبوں سے تعلق رکھنے والے خواتین وحضرات شرکت کریں گے۔

ڈاکٹر نگہت نسیم کے اعزاز میں عشائیے کی چند تصاویر