اللہ تعالیٰ جو خالق الخالقین ہے اسنے انسان کو احسن الخلق بنایا اور ہر انسان میں ایک نہیں کئی کئی جوہر رکھے لیکن یہ تو اس انسان پر منحصر ہے کہ وہ اپنے اندر مخفی یہ جوہر کیسے افشا کرتا ہے

دنیا میں آپکو ایسی درجنوں نہیں سینکڑوں مثالیں ملیں گی جہاں افراد نے اپنے عزم اور محنت سے مشکل ترین اور نامساعد حالات کے باوجود اپنی مخفی صلاحیتوں کو اجاگر کیا اور اندھیروں میں بھی اپنے لیئے روشنی کے راستے تخلیق کیئے ایسے راستے جن پر دوسرے لوگ بھی چل کر اپنی منزل کا سراغ پا سکتے ہیں

خوش گلو و خوش آواز محمد رضا کی پروررش بھی ایسی ماں کی آغوش میں ہوئی ہے جو خود ایک مثالی ماں اور مثالی خاتون ہیں۔

 انکی والدہ گلگت بلتستان کی پہلی کاشتکار اور دستکار خاتون ہیں جنہوں نے اپنے علاقے کی فرسودہ روایات کو توڑتے ہوئے معیشی ترقی میں خواتین کے کردار کو اجاگر کرنے میں اپنی صلاحیتوں کو پورے علاقے کے لیئے ایسا کارآمد اور فعال کیا کہ ایک چراغ سے کتنے ہی چراغ روشن ہوئے اور انکے عزم و عمل کے اعتراف کے طور پر انکو متعدد ایوارڈ بھی ملے

ریڈیو اسکردو گلگت بلتستان میں پہاڑوں، جھیلوں اور وادیوں سے اٹھتی ہوئی پاکستان کی وہ آواز ہے جو سیاچین کی بلندیوں تک بھی سنی جا سکتی ہے اور انتڑنیٹ کے ذریعے دنیا بھر میں اسکی نشریات قابل سماعت ہیں

ابھی حال ہی میں ریڈیو پاکستان کی ترقی پانے والی ڈپٹی کنٹرولر معروف شاعرہ اور تخلیق کار کوثر ثمرین نے ریڈیو اسکردو پر پہلی خاتون اسٹیشن ڈائریکٹر کے طور پر خدمات سرانجام دی ہیں 

 انکی ذاتی تخلیقی اور فنی صلاحیتوں کے باعث بہت کم عرصے میں ریڈیو اسکردو کی نشریات میں بے پناہ مثبت اور انقلابی تبدیلیاں آئیں اور خاص طور پر بیرونی ممالک میں انٹرنیٹ کے ذریعے ریڈیو سکردو کے پروگراموں کی مقبولیت میں اضافہ ہوا۔