خوف آنے لگا مجھکو چاہت کے اجالوں سے۔
اَب دور ہی رہتی ہوں رنگین خیالوں سے
میں بھول گئی یہ بھی کیسا ہے میرا چہرہ
آئینہ بھی جو میں نے دیکھا نہیں سالوں سے
ہم جیسے ہی ناداں تو پھنس جاتے ہیں مشکل میں
محتاط نہیں رہتے جو مکڑی کے جالوں سے
سونپا تھا جو پتھر کی مورت کو یہ دِل ہم نے
پھر ربط ہوا اپنا دِل ٹوٹنے والوں سے
انسان کی بدبختی جب رنگ دکھاتی ہے
رُکتی نہیں بربادی ، تدبیر کی ڈھالوں سے
ہاں خندہ محبت کا حق اُن کو نہیں حاصل
الفت میں جو ڈرتے ہیں دنیا کے سوالوں سے
/////////////////////////////////////////////////////
////////////////////////////////////////////////////
دل کا عالم بھی ہوا ہے عالم ِ ہُو کی طرح
ہر گھڑی وہ آنکھ میں رہتا ہے آنسو کی طرح
دِل کے موسم میں کبھی تبدیلیاں آتی نہیں
لگتی ہے بادِ صبا بھی گُنگُنی لو کی طرح
اک تصور سے ترے مہکا ہےمیرا انگ انگ
تُو مرے احساس میں بَستا ہے خوشبو کی طرح
سخت کالی رات میں اُمید کا ننھا دیا
ہے فروزاں دِل میں اِک معصوم جگنو کی طرح
وصل کا عالم کہ جیسے ہوں شفق کی لالیاں
ہجر کا ماحول ہے قربت کے جادوکی طرح
آ گئی لفظوں میں بھی لہجے کی تلخی اس قدر
آپ بھی اُس نے کہا مجھکو مگر تو کی طرح
دھوپ میں بیٹھی تھی اپنے باغ میں اور یوں لگا
ٹہنیاں دو شجر کی ہیں اُسکے بازو کی طرح
اسکو بھی ہر وقت رہتا ہے تلفظ کا خیال
عشق میں نے بھی کیا ہے اُس سے اردو کی طرح
گفتگو کا اک الگ سا منفرد انداز ہے
لفظ اسکے بولتے ہیں جیسے گھنگھرو کی طرح
دیکھتے ہی دہکھتے خندہ ؔ گزر جائے گی عمر
وقت ہاتھوں سے نکل جائے گا جگنو کی طرح
(0) آپکی رائے
پرنٹ
احباب کو بتائیے
اُوپر