غزل
ہر ایک بوند ہمیں آبشار لگتی ہے
ہماری تشنگی بے اختیار لگتی ہے
نفس نفس پہ مسلَط ہے قہر ِ تنہائی
بہت اُداس سی اَب کے بہار لگتی ہے
قدم قدم پہ سیہ ظلمتیں ہیں خیمہ زن
یہ لو چراغ کی بھی بیقرار لگتی ہے
طلسم توڑ دیا شب کا لاکھ سورج نے
مگر یہ صُبح بھی ناپائیدار لگتی ہے
قطار بجھنے کو ہے شب زدہ چراغوں کی
نوید صُبح بڑی خوشگوار لگتی ہے
ہے آج اپنے تحمل کا امتحاں شاید
شکستہ آج حدِ اعتبار لگتی ہے
زباں خموش ہے خندہ ؔ سماعتیں خاموش
مگر یہ کس کی صدا بار بار لگتی ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نمبر ۲
شجر ہوں شاخ ہوں ،گُل ہوں ،صبا ہوں
ہتھیلی پر رچی کوئی حنا ہوں
جو اَب تک حلق سے باہر نہ آئی
میں وہ سہمی ہوئی بے دَم صدا ہوں
کوئی ٹوٹی ہوئی پازیب ہوں میں
کوئی ٹکڑے ہوئی جیسے قبا ہوں
نظر آتا ہے مجھ میں عکس تیرا
میں تیری ہی نظر کا آئینہ ہوں
مجھےچھو کر کوئی اک بار دیکھے
گلابوں میں بسی تازہ ہوا ہوں
وفا کی آبرو مجھ سے ہے خندہ ؔ ۔
زمانہ لاکھ کہہ دیے بے وفا ہوں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
غزل
کروں تُجھ سے بیوفائی ،یہ مجھے روا نہیں تھا
اُسے بے وفا نہ کہنا کہ وہ بے وفا نہیں تھا
یہ کسی کی سازشیں تھیں ،یا تھی مرضٗی زمانہ
میرا تُجھ سے دور ہونا میرا فیصلہ نہیں تھا
کہیں دور آ گئی تھی ،میں حدود ِ زندگی سے
میرے پاس واپسی کا کوئی راستہ نہیں تھا
میری حالت ِ زبوں سےتھا ہر ایک شخص واقف
میں یہ کیسے مان جاؤں کہ تُجھے پتہ نہیں تھا
رہی ساتھ زندگی کے ،میں کچھ ایسے زندگی بھر
مرا زندگی سے جیسے کوئی واسطہ نہیں تھا
رہے دِل پہ اے زمانے ترا زور و جبر کب تک
کیا فقط ترا خدا تھا کیا میرا خدا نہیں تھا
اسے بھولنے کی خندہ ؔ کی ہزار بار کوشش
اسے بھولنےکا لیکن مجھے حوصلہ نہیں تھا
(0) آپکی رائے
پرنٹ
احباب کو بتائیے
اُوپر