ہندوستان کے زیر انتظام کشمیر میں عسکریت پسند پیرا ملٹری فورس کے قافلے پر حملہ کرتے ہوئے دو سپاہیوں کو ہلاک کرنے کے بعد ایک قریبی سرکاری عمارت میں داخل ہو گئے۔

ہفتہ کو سری نگر کے مضافات میں پیرا ملٹری ’سینٹرل ریزرو پولیس فورس‘ کے قافلے پرحملے کےبعد عسکریت پسند ایک قریبی سرکاری عمارت میں داخل ہو گئے، جہاں سیکیورٹی فورسز اور حملہ آوروں کے درمیان فائرنگ جاری ہے۔

پولیس انسپکٹر جنرل جاوید جیلانی نے دو اہلکاروں کی ہلاکت اور دس کے زخمی ہونے کی تصدیق کی ۔انہوں نے بتایا کہ عمارت میں موجود تمام شہریوں کو باحفاظت نکال لیا گیا ۔

ان کا کہنا تھا کہ عمارت کے اندر وقفے وقفے سے فائرنگ کی آوازیں آ رہی ہیں جبکہ دس زخمی سپاہیوں کو ہسپتال منتقل کر دیا گیا۔

عینی شاہدین کے مطابق، عمارت میں تین عسکریت پسند موجود ہیں۔ان کا کہنا تھا کہ حملہ آوروں نے عمارت میں داخل ہونے کے بعد وہاں موجود لوگوں کو جلد از جلد بھاگ جانے کو کہا اور پھر عمارت کے ہاسٹل میں چلے گئے۔