کراچی میں پولیس نے دہشت گردوں پر کاری وار کیا ہے۔ پپری اور گڈاپ میں پولیس سے مقابلے میں 12 دہشت گرد مارے گئے ہیں۔ گولیاں لگنے سے دو پولیس اہلکار زخمی بھی ہوئے۔ رینجرز نے لیاری کے دو خطرناک گینگسٹرز کو گرفتار کرلیا ہے۔نیشنل ہائی وے پپری کے مقام پر ایس ایس پی ملیر راؤ انوار کی سربراہی میں پولیس نے کارروائی کی۔

 سرچ آپریشن کے دوران دہشت گردوں نے پولیس پر فائرنگ کردی جس سے دو اہلکار زخمی ہوگئے۔ فائرنگ کے تبادلے میں آٹھ دہشت گرد مارے گئے۔جبکہ چار دہشتگرد موٹرسائیکلوں پرفرار ہوگئے۔  پولیس نے چاروں فرار ہونے والے دہشتگردوں کو گڈاپ کے مقام پر گھیرے میں لے لیا ۔ جہاں فائرنگ کے دوران چاروں دہشتگرد مارے گئے ۔ایس ایس پی راؤ انوار کا کہنا ہے کہ دہشت گردوں کے بعض ساتھی فرار ہونے میں کامیاب ہوگئے۔ پولیس آپریشن کے دوران چار سے زائد دھماکے بھی سنے گئے۔

 کارروائی میں اسلحہ بھی برآمد ہوا۔دوسری جانب سندھ رینجرز ونگ کے کمانڈر لئیق نے پریس کانفرنس کرتے ہوئے بتایا کہ لانڈھی میں کارروائی کی گئی ہے جہاں لیاری گینگ وار اور کالعدم پیپلز امن کمیٹی کے دو بھتہ خوروں کو گرفتار کرلیا گیا۔ بھتہ خور منور اور رفیق کی گرفتاری مانیٹرنگ اور تکنیکی سرویلنس کے نتیجے میں ہوئی۔ونگ کمانڈر کا کہنا تھا کہ ملزمان چوبیس سے زائد بھتہ خوری کی وارداتوں میں ملوث ہیں۔ رینجرز حکام نے کہا کہ ملزمان جلد پولیس کی تحویل میں دیے جائیں گے۔