گہوارۂ تہذیب کی معمار ہے عورت
ڈاکٹر احمد علی برقیؔ اعظمی
آرائش و تزئین سے سرشار ہے عورت
فطرت کے ہر اِک حُسن کا اظہار ہے عورت
ماں، بیٹی،بہن، بیوی کی صورت میں ہمیشہ
بس پیار ہے، بس پیار ہے، بس پیار ہے عورت
ماں وہ ہے نہیں جس کا کہیں بھی کوئی ثانی
ہر شخص کی تعظیم کی حقدار ہے عورت
بیٹی و بہن مونس و غمخوار ہیں سب کی
شوہر کی محبت کی طلبگار ہے عورت
ہے شرم و حیا سے نہیں بڑھ کر کوئی زیور
گہوارۂ تہذیب کی معمار ہے عورت
پاکیزگئ نفس ہے عورت کا تقدس
شیرینئ گفتار کا معیار ہے عورت
اِس دورِ پُرآشوب میں احمد علی برقیؔ 
کیوں ظلم سے اور جبر سے دوچار ہے عورت