نئی حج پالیسی: ایک لاکھ تینتالیس ہزار سے زائد افراد حج کی سعادت حاصل کریں گے

وفاقی وزیر مذہبی امور سردار محمد یوسف نے حج پالیسی دو ہزار سولہ کا اعلان کرتے ہوئے کہا کہ۔ اس سال ایک لاکھ تینتالیس ہزار سے زائد افراد حج کی سعادت حاصل کریں گے۔ جبکہ نئی پالیسی کے تحت حج کیلئے درخواستیں اٹھارہ اپریل سے وصول کی جائیں گی۔اسلام آباد میں رواں سال کی حج پالیسی کا اعلان کرتے ہوئے وزیر مذہبی امور سردار محمد یوسف نے بتایا کہ اس سال ایک لاکھ تینتالیس ہزار سے زائد افراد حج کی سعادت حاصل کریں گے۔

 پرائیوٹ حج کوٹہ کے تحت ستاون ہزار افراد حج پر جاسکیں گے۔ چھیاسی ہزار سے زائد افراد سرکاری اسکیم کے تحت حج کی سعادت حاصل کریں گے، نئی حج پالیسی کے تحت سرکاری اسکیم کے تحت حج کی قرعہ اندازی انتیس اپریل کو ہوگی جبکہ حج کیلئے درخواستیں اٹھارہ سے چھبیس اپریل سے آٹھ بینکوں کی مخصوص برانچوں میں وصول کی جائیں گی۔وزیر مذہبی امور کے مطابق سرکاری اسکیم میں حج کیلئے جنوبی ریجن کیلئے کل اخراجات دو لاکھ اکسٹھ ہزار نو سو اکتالیس روپے جبکہ شمالی ریجن پنجاب اور خیبر پختونخوا کیلئے حج اخراجات دو لاکھ ستر ہزار نو سو اکتالیس روپے ہونگے۔ ان کا کہنا تھا کہ کسی کو بھی مفت حج نہیں کرایا جائے گا۔

وفاقی وزیر مذہبی امور سردار یوسف نے مزید بتایا کہ حجاج کو چوبیس گھنٹے ٹراسپورٹ سروس مہیا ہوگی۔ ساتھ ہی ہنگامی حالات سے نمٹنے کیلئے جامع منصوبہ بھی ترتیب دے رہے ہیں۔ حجاج کرام کی ائیرپورٹ پر جوس  پھلوں اور سینڈوچ سے تواضع کی جائے گی جبکہ حجاج پانچ لیٹر آب زم زم اپنے ہمراہ لا سکیں گے۔