خصوصی عدالت میں پرویز مشرف کے بیرون ملک جانے پر خصوصی عدالت نے سیکرٹری داخلہ کے جواب کو مسترد کردیا۔ سماعت کے دوران سیکریٹری داخلہ کی عدم حاضری پرعدالت کی جانب سے اظہاربرہمی۔جسٹس مظہر عالم میاں خیل کی سربراہی میں خصوصی عدالت کے تین رکنی بینچ نے سنگین غداری کیس کی سماعت کی۔ 

سماعت کے دوران عدالت نے سیکرٹری داخلہ کی جانب سے جمع کرایا گیا جواب مسترد کردیا۔عدالت کے استفسار پر جوائنٹ سیکرٹری داخلہ مبارک علی نے بتایا کہ سیکرٹری داخلہ رخصت پر ہیں۔ جس پرجسٹس مظہر عالم میاں خیل نے اظہار برہمی کرتے ہوئے کہا کہ ایسی کیا وجہ ہے کہ ہمارے بلانے کے باوجود وہ چھٹی پر ہیں۔ سیکرٹری داخلہ خود شکائت کنندہ ہیں ان کا رویہ ناقابل سمجھ ہے۔ 

ان کا کہنا تھا کہ موجودہ صورتحال میں پرویز مشرف کی بیرون ملک روانگی کا کس کو ذمہ دار ٹھہرایا جائے۔استغاثہ کے وکیل اکرم شیخ نے بتایا کہ سیکرٹری داخلہ سمجھے کہ خصوصی عدالت نے مشرف کا نام ای سی ایل میں نہیں ڈالا اس لیئے جانے دیا گیا۔ اب جبکہ مشرف باہر جاچکے ہیں توتین سو بیالیس کا بیان سکائپ سے ریکارڈ کیاجاسکتا ہے۔جس پر عدالت کا کہنا تھا کہ اس معاملے کو بعد میں دیکھیں گے، تاہم عدالت نے جوائنٹ سیکرٹری کو سیکرٹری داخلہ سے رابطہ کرکے آگاہ کرنے کا حکم دے دیا۔