وزیر اعظم نے کراچی میں پولیس پر دہشتگرد حملے کی مذمت کرتے ہوئے کہا ہے کہ پولیس اہلکاروں نے آئندہ نسلوں کا مستقبل محفوظ بنانے کیلئے قربانیاں دیں۔ وزیر اعلی سید قائم علی شاہ نے آئی جی سندھ کو ہدایت کی ہے کہ قاتلوں کی گرفتاری کے لیے فوری اقدامات کیے جائیں۔

وزیر اعظم محمد نواز شریف کا کراچی میں پولیس پر ہونے والے دہشتگردوں کے حملے کی شدید الفاظ میں مزمت کرتے ہوئے کہنا تھا کہ امن کی فراہمی میں پولیس کی قربانیاں ناقابل فراموش ہیں۔ پولیس ملک بھی میں خاص طور پر کراچی میں امن کیلئے بھرپور کردار ادا کررہی ہے۔وزیر اعظم نے غمزدہ خاندانوں سے اظہار تعزیت کرتے ہوئے کہا ہے کہ پوری قوم قانون نافذ کرنیوالے ادارون کیساتھ کھڑی ہے۔ وزیر داخلہ چوہدری نثار نے کراچی میں پولیس حملے پر نوٹس لیتے ہوئے واقع کی فوری رپورٹ طلب کرلی۔

دوسری جانب وزیر اعلی سید قائم علی شاہ نے آئی جی سندھ کو ہدایت کی ہے کہ قاتلوں کی گرفتاری کے لیے فوری اقدامات کیے جائیں۔ ان کا کہنا تھا کہ دہشت گرد قوم کو کمزور کرنا چاہتے ہیں۔صوبائی وزیر داخلہ سہیل انور سیال کا کہنا ہے فائرنگ کا واقعہ اچانک پیش آیا ہے اس لئے وائرلیس پر اہلکاروں کی بات نہیں ہوسکی، جبکہ حملے کو سیکیورٹی لیپس نہیں کہا جاسکتا۔ ان کا کہنا تھا کہ پولیس اہلکاروں نے جان دے کر پولیو ٹیم کو محفوظ رکھا، جبکہ قاتلوں کو جلد گرفتار کر لیا جائے گا۔