سندھ ڈیموکریٹک الائنس نے وزیر اعظم کی طرف سے تحقیقاتی کمیشن کے قیام کا خیر مقدم کردیا،جبکہ ترجمان سندھ ڈیمورکیٹک الائنس کا کہنا ہے عمر کوٹ کا جلسہ سندھ حکومت کے خلاف ریفرنڈم تھا۔

کراچی میں سندھ ڈیموکریٹک الائنس کا اجلاس مسلم لیگ فنکشنل سندھ کے صدر پیر صدرالدین شاھ کی زیرصدارت ہوا۔ اجلاس میں سید غوث علی شاہ، غلام مرتضی جتوئی، ایاز لطیف پلیجو، ڈاکٹر ارباب غلام رحیم، لیاقت جتوئی سمیت دیگر سیاسی رہنماؤں نے شرکت کی۔ اس موقع پر پیر صدر الدین شاہ نے کہا کہ وزیر اعظم نے سپریم کورٹ کے چیف جسٹس کو خط لکھ کر اپنی ذمہ داری پوری کردی ہے۔ محض کرپشن کے الزام پر حکومت سے مستعفٰی ہونے کا مطالبہ قبل از وقت ہے۔۔وفاقی حکومت میں رہنے یا نہ رہنے کا فیصلہ پیر پگارہ کریں گے۔

دوسری جانب گرینڈ الائنس نے بائیس مئی کو حیدر آباد میں پہلا کنونشن بلانے کا اعلان کردیا ہے،جبکہ پانچ جون کو کراچی میں دوسرا کنونشن منعقد کیا جائے گا۔ ترجمان سندھ گرینڈ الائنس ایاز لطیف پلیجو نے کہا کہ عمر کوٹ کا جلسہ سندھ حکومت کے خلاف ریفرنڈم تھا۔ انھوں نے کہا کہ تعلیم، صحت، ریوینیو، آبپاشی اور صوبے کی ڈیولپمنٹ اتھارٹیز میں کھربوں کی کرپشن ہوئی ہے۔ سندھ سے چھپن کروڑ ڈالرکشتیوں کے ذریعے باہر منتقل کئے گئے ہیں۔