تحریک انصاف کے چیئرمین عمران خان نے کہا ہے کہ پاناما لیکس میں میرا، جہانگیر ترین یا خورشید شاہ کا نام نہیں آیا بلکہ وزیر اعظم نواز شریف اور ان کے بچوں کے نام آئے ہیں ، وزیر اعظم کے ساتھ صرف اثاثے ڈکلیئر نہ کرنے پر اختلاف ہے، انہیں بتانا پڑے گا کہ آف شور کمپنیوں میں ان کی سرمایہ کاری کے لئے پیسہ ملک سے باہر کیسے گیاتھا،نوازشریف الزام نہ لگائیں، حساب دیں، غلط کام نہیں کیا تو قوم کے سامنے سچ بول دیں، میں نے رائیونڈ میں جا کر صرف وزیر اعظم کو اپنی پٹیشن دینی ہے کہ بتائیں انہوں نے باہر پیسہ ڈکلیئر کرکے بھیجا یا وہ منی لانڈرنگ اور ٹیکس چوری سے بھجوایا گیا ، اگر عابد شیر علی نے بنی گالہ کا گھیرائو کرنا ہے تو وہ آئیں یہاں موسم بہت اچھا ہے۔

 ان خیالات کا اظہار انہوں نے لاہور روانگی سے قبل بنی گالہ میں صحافیوں سے گفتگو کرتے ہوئے کیا۔ عمران خان نے کہا کہ اگر نواز شریف نے اپنا پیسہ حلال طریقے سے بھجوایا ہے تو وہ آدھے گھنٹے میں اس کی تفصیل قوم کو بتادیں کیونکہ اپنی وضاحت کے لئے کبھی وہ مانسہرہ کبھی شنکیاری جا رہے ہیں ، آگے پتا نہیں انہوں نے کہاں جانا ہے، انہیں کچھ بھی کرنے کی ضرورت نہیں صرف بیرون ملک بھیجے گئے اپنے پیسے سے متعلق بتا دیں۔ انہوں نے کہا کہ وزیر اعظم ہائوس میں اپوزیشن کی کردار کشی کے لئے سیل چلایا جا رہا ہے ، یہ پہلی حکومت ہے جو لوگوں کو پکڑنے کی بجائے انہیں بلیک میل کر رہی ہے ،

 سرکاری خزانے سے اپنی پوزیشن واضح کرنے کے لئے حکومت کروڑوں روپے اشتہاروں پر لگا رہی ہے لیکن پانامہ لیکس کی تفتیش کے لئےٹی او آرز اپوزیشن کی مرضی کے چلیں گے کیونکہ یہ طے ہونا ہے کہ پیسہ کرپشن کا تھا ، ٹیکس چوری کا تھا یا منی لانڈرنگ کر کے لے جایا گیا تھا