قومی اسمبلی اور سینیٹ کے ہنگامہ خیز اجلاس آج ہوں گے۔ اپوزیشن جماعتوں کی جانب سے پانامہ لیکس پرحکومت کو ٹف ٹائم دینے کا فیصلہ۔قومی اسمبلی کا اجلاس آج شام پانچ بجے جبکہ سینیٹ کا اجلاس سہ پہر تین بجے ہو گا۔ ذرائع کے مطابق پانامہ لیکس کی تحقیقات کے ٹی او آرز پر اپوزیشن کی جانب سے حکومت پر شدید تنقید متوقع ہے، جبکہ سینیٹ اور قومی اسمبلی اجلاس سے قبل دونوں ایوانوں میں اپوزیشن کے پارلیمانی رہنماؤں کے الگ الگ اجلاس ہوں گے۔ جس میں دونوں اجلاسوں کے لئے حکمت عملی طے کی جائے گی۔

خورشید شاہ کی زیر صدارت قومی اسمبلی میں اپوزیش جماعتوں کے پارلیمانی رہنماوں کا اجلاس سہ پہر تین بجے ہو گا۔ اجلاس میں پانامہ پیپرز اور قائد حزب اختلاف کی جانب سے وزیراعظم کو لکھے گئے خط پر تبادلہ خیال کیا جائےگا۔مشترکہ اپوزیشن کے اجلاس میں پیپلزپارٹی، پاکستان تحریک انصاف، مسلم لیگ ق، عوامی نیشنل پارٹی اور قومی وطن پارٹی کے پارلیمانی رہنما شریک ہوں گے، جبکہ سینیٹ میں اپوزیشن جماعتوں کے پارلیمانی رہنماؤں کا اجلاس دن دو بجے سینیٹر اعتزاز احسن کی سربراہی میں ہو گا۔