وزیراعظم پاکستان میاں محمد نواز شریف دو روزہ دورے پر تاجکستان روانہ ہو گئے ہیں۔ وزیراعظم تاجک صدر سے ملاقات کے علاوہ توانائی کے منصوبے کی افتتاحی تقریب میں بھی شرکت کریں گے۔

ترجمان وزیراعظم ہاؤس کے مطابق وزیراعظم نوازشریف دو روزہ دورے پر تاجکستان روانہ ہو گئے ہیں۔ دورے کے دوران وزیراعظم نوازشریف تاجک صدر امام علی رحمان سے ملاقات کریں گے۔ 

ملاقات میں دونوں رہنما پاکستان تاجکستان دو طرفہ تعلقات سمیت علاقائی اور بین الاقوامی امور پر تبادلہ خیال کریں گے۔

ذرائع کے مطابق وزیراعظم نوازشریف دورے کے دوران توانائی کے منصوبے کاسا ایک ہزار کی افتتاحی تقریب میں بھی شریک ہوں گے۔ 

منصوبے سے پاکستان کو ایک ہزار میگا واٹ، جبکہ افغانستان کو تین سو میگاواٹ بجلی حاصل ہو گی۔