وزیر اعظم نواز شریف کا کہنا ہے کہ میری دلی خواہش ہے چیف جسٹس پانامہ لیکس کی تحقیقات پر خود کمیشن بنائیں۔ میں کمیشن میں پیش ہونے کے لئے تیار ہوں۔دوشنبے سے اسلام آباد واپسی پر طیارے میں صحافیوں سے گفتگو میں وزیراعظم نواز شریف نے پاناما لیکس کی تحقیقات کےلیے چیف جسٹس کی جانب سے کمیشن کے جلد قیام کی خواہش کا اظہارکیا۔

 یہ بھی کہا وہ معاملے کی تحقیقات کرانا چاہتے ہیں لیکن اپوزیشن تحقیقات نہیں سر جھکانا چاہتی ہے، کوئی سیاستدان خودکمیشن بنانے کی کوشش نہ کرے۔ پانامہ لیکس کی تحقیقات کے حوالے سے اپوزیشن تقسیم ہے ۔ اعتزاز احسن نے ایف آئی اے جبکہ عمران خان نے نیب سے تحقیقات کا کہا۔ 

انہوں نے کہا کہ پارلیمنٹ میں صرف پارلیمنٹ کی بات ہو گی۔ جو لوگ پانامہ لیکس پر شور مچا رہے تھےاب ان کے نام بھی آئے ہیں اب میڈیا کو انصاف کرنا چاہئے، ان کے نام بھی لیں۔وزیراعظم نے کہا کہ دھرنے والے ملک کی ترقی کے خلاف ہیں ۔ان کا ایجنڈا صرف سڑکیں بلاک کرنا ہے۔ وزیراعظم نے اس عز کو دہرایا کہ دوہزاراٹھارہ تک لوڈشیڈنگ کامکمل خاتمہ کردیا جائے گا۔ یہ بھی کہا کہ بجلی کی قیمتیں کم کیں مزید سستی کرینگے۔۔بجلی بنانے کے متعدد منصوبوں پر کام ہو رہا ہے۔