پاک سرزمین پارٹی کے رہنما مصطفی کمال کا کہنا ہے کہ انہیں فاروق ستار کی زندگی سے متعلق بہت خدشات ہیں اس لیے انکی حفاظت کی جائے۔ حیدرآباد میں پریس کانفرنس سے خطاب کرتے ہوئے پاک سرزمین پارٹی کے رہنما کا کہنا تھا کہ فاروق ستار بھی ایم کیو ایم کے قائد کی باتیں اسی لیے برداشت کرلیتے ہیں کہ وہ خود کو قائد ایم کیو ایم کے بعد پارٹی کا قائد سمجھتے ہیں، تاہم ان کی زندگی کو خطرات لاحق ہیں ۔ 

ان کاکہنا تھاکہ لندن میں پاک سرزمین پارٹی کا دفتر کھولنا لازمی ہوگیا ہے اوروہ جلد اس کا اعلان کریں گے، جبکہ دفتر کھولتے ہی لندن میں ایم کیو ایم کے قائد الطاف حسین کے گھر کے باہر احتجا ج کیا جائے گا ۔ 

مصطفی کمال کا کہنا تھاکہ وہ تو مخالفین کو شیطانی چکر سے نکالنے آئے ہیں اور وہ اس عزم پر قائم ہیں کہ نفرتوں کو ختم کرکے محبت کو فروغ دیں گے۔ایک سوال کے جواب میں سابق سٹی ناظم کا کہنا تھا کہ اگر ہمیں اسٹیبلشمنٹ کی سپورٹ ہوتی تو قائد ایم کیو ایم بھی ہم کو جوائن کرچکے ہوتے۔