وزیراعلیٰ پنجاب شہبازشریف نے کہا ہے کہ ملک کسی بھی صورت منفی یا انتشار کی سیاست کا متحمل نہیں ہوسکتا۔ کسی کو ملکی ترقی کے راستے پر رکاوٹیں ڈالنے نہیں دیں گے۔لاہور میں وزیراعلیٰ پنجاب شہبازشریف سے مختلف اضلاع سے تعلق رکھنے والے اراکین اسمبلی نے ملاقات کی۔

 ذرائع کے مطابق ملاقات میں موجودہ سیاسی صورتحال اور ترقیاتی منصوبوں پر تفصیلی گفتگو کی گئی۔ اس موقع پر شہباز شریف کا کہنا تھا کہ بعض سیاسی عناصر صرف ذاتی مفادات کی خاطر ملک کی ترقی کو روکنے کے درپے ہیں، تاہم خوشحالی کے سفر میں اٹھارہ کروڑ عوام اب رکاوٹ نہیں ڈالنے دیں گے۔

ان کا کہنا تھا کہ سیاست عوام کی بے لوث خدمت کا نام ہے، جبکہ ہمارا ہر قدم ملک کی ترقی اور عوام کی خوشحالی کیلئے اٹھ رہا ہے۔ وزیراعظم محمد نواز شریف کی قیادت میں پاکستان میں ترقی، خوشحالی امن اور امید کا سفر شروع ہو چکا ہے۔