دوستو ! 

اسلامی نظریاتی کونسل کی طرف سے جاری بیان " عورتوں کا مارنا جائز ہے بس ان کی ہڈی نا ٹوٹے " نے عورتوں میں جو شدید بے چینی پیدا کی ہے وہاں پر اسلام کی طرف مائل غیر اسلامی  افراد کو سخت صدمے سے دوچار کر دیا ۔ اور وہ طبقہ جو زرا سا بھی سوچ بچار کا عادی ہے وہ  سرجھکائے سوچ رہا ہے کہ کیا میرا خدا اتنا غیر عادل ہے کہ ایک ہی طرح کی سرکشی  جو عورت کرے تو مرد اس کا گوشت ہڈیوں سے بیشک اتار پھینکے بس ہڈی نا ٹوٹے اور جو وہی سرکشی آدمی کرے تو ۔۔۔۔۔۔۔۔۔۔۔ عورت سکون و آرام سے اپنی چوٹیں سہلاتی خاموش رہے ۔۔۔۔۔۔۔۔۔۔۔۔ 

کیا یہ واقعی  وہ اسلام ہے جو خود کو جدید ترین دین کہتا ہے یا یہ چند آدمیوں کا گھڑا ہوا منصوباتی دین ہے جو صرف اور صرف عورتوں کے خلاف ہے ۔۔۔۔۔۔ 

پیدا ہو تو مار دی جائے ۔۔ بڑی ہو تو تعلیم سے محروم کر دی جائے ۔۔ شادی اس کی ہو اور فیصلہ باپ بھائی کا ہو ۔۔۔  ٖفیصلے سے انکاری ہو تو جلا دی جائے ۔۔ مار دی جائے ۔۔ پتھروں سے لہولہان کر دی جائے ۔۔ گھر میں اناج نا ہو تو کوڑیو کے بھاؤ بیچ دی جائے ۔۔ کوٹھوں کی زینت بنا دی جائے اور وہی باپ بھائی ان سے اپنی اولاد بھی پیدا کرے ۔۔۔۔۔۔ شوہر کے گھر جائے ٹھوکروں میں پڑی رہے ۔۔۔ وہ ہمبستری نا کرنا چاہے تو اس پر صبح تک فرشتے لعنت کریں ۔۔۔ یہ عورت جو لڑکی جنے تواسے  طلاق دیدی جائے ۔۔ 

اے ایمان والو ، اے صبح و شام اللہ کے رسول کا درود پڑھنے والو، اے نبی کے روضے پر دھاڑیں مار کے رونے والو، اے حجر اسود کو بسہ دینے کے لیئے مرنے والو، اے ایک عور بی بی حاجرہ کی سنت نبھانے کے لیئے صفا مرویٰ کی سعی کرنے والو ، اے عورت کوپاوں کے نیچے جنت والی  ماں کہنے والو، آؤ دربار رسول میں اور مجھے بتاؤ کہ کیا عورت کا قصور یہی ہے کہ وہ عورت ہے اور مسلمان ہے سو اسے " جدید دین " پر صرف مار کھانی ہے چاہے اس کا اٹھنا بیٹھنا سرکشی کے دائرے میں آتا ہو یا نا ہو ۔۔۔ کیونکہ خدا تو مردوں کا ہے ۔۔۔۔ اس قدر سیکسیٹ دین کیا اسلام ہو سکتا ہے ۔ جو رحمت اور برابری کا پیغام لے کر آیا ۔۔۔ 

پھر یہ کیسے ممکن ہے کہ مرد اپنی عورت کے ہوتے ہوئے اس کے سامنے اپنی گرل فرینڈ کے ساتھ رنگ رلیاں منائے ۔۔اپنی بیوی کو ہر طرح سے ترسائے اور اس کے ایک بھی حقوق ادا نا کرے ۔۔۔  دوستوں کے ساتھ شراب پیئے ۔۔ نشے میں بیٹی بہن کی تمیز نا کرے ۔۔ کوٹھوں پر لاکھوں روپے لٹائے ۔۔ اپنے حرم میں پچاس لونڈیوں کی مد میں اپنی پسند کی عورتیں رکھے ۔۔۔ پر اس کے لیئے قران کی کوئی آیت نا اترے جو مولوی اور نظریاتی کونسل کو نظر آئے اور یہ بیان دے کہ " ایسے مردوں کی کھال کھینچ دی جائے بس زراخیال رہے  ہڈی نا ٹوٹے ۔۔۔۔۔۔۔۔۔۔ 

دوستو !

یہ ابو جہل کی اولادیں ہیں جو نظریاتی کونسل میں بیٹھ کر ایسے بیان دیتی ہیں اور سورت النساء کی آیت نمبر 16 کا ترجمہ اپنی نیت اور باپ دادا سے چلے آئے ترجمے کے حساب سے کرتے ہیں ۔۔۔۔ جو دراصل یہ ہے ۔۔۔۔۔۔۔۔۔

ترجمہ: "اگر تم میں سے دونوں (یعنی میاں بیوی) بے حیائی کے مرتکب ہوں، دونوں کو ہلکی سزا دو اور جب وہ توبہ کریں اور اپنی اصلاح کر لیں تو پھر ان سے در گزر کرو" (سورہ النسا ۔۱۶)

آج کا شاطر مولوی اور تمام شکی القلب مرد جو خود دودھ کا دھلا سمجھتے ہیں وہ مرد کو ہٹا دیتے ہیں اور صرف عورت کو نشانہ بنا لتے ہیں ۔ کیونکہ اسی آیت کا ترجمہ اور تفسیر پرانی کچھ اس طرح سے ہے 

"ترجمہ: مرد حاکم ہیں عورتوں کے، یہ سبب اس کے کہ جو خرچ کرتے ہیں اپنی مالوں سے پس نیک بخت عورتیں فرمانبردار ہیں، نگہبانی کرنے والی ہیں، بیچ غائب کے ساتھ محافظت اللہ کے اور جو عورتیں کہ تم ڈرتے ہو سرکشی ان کی سے پس نصیحت کرو ان کو اور چھوڑ دو بیچ ان کو خوابگاہ کے اور مارو ان کو، پس اگر کہا مانیں تو مت ڈھونڈو اور ان کی راہ، تحقیق اللہ تعالی بلند بڑا ہے (سورہ توبہ النسا ۳۴۔۴ ترجمہ شاہ رفیع الدین صاحب)"۔ ۔ ۔ 

یہ قدیم ترجمہ ہم نے جان بوجھ کر پیش کیا ہے۔ اس اسی کے مقابلے میں اسی آیت کا ترجمہ ایک جدید خیال روشن عالم دین کے قلم سے ملاحظہ ہو۔ ۔ ۔

"ترجمہ: مرد عورتوں کے سرپرست ہیں، بوجہ اس کے کہ اللہ تعالی نے ایک دوسرے پر فضیلت بخشی ہے اور بوجہ اس کے کہ انہوں نے اپنے مال خرچ کئے پس جو نیک بیبیاں ہیں، وہ فرمانبرداری کرنے والی، رازوں کی حفاظت کرنے والی ہوتی ہیں، بوجہ اس کے کہ خدا نے بھی رازوں کی حفاظت فرمائی ہے اور جن سے تمہیں سرتابی کا اندیشہ ہو، تو ان کو نصیحت کرو ان کو ان کے بستروں میں تنہا چھوڑدو اور ان کو سزا دو، پس اگر وہ تمہاری اطاعت کریںتو ان کے خلاف راہ نہ ڈھونڈو بے شک اللہ تعالی بہت بلند اور بڑا ہے۔ ۔ (سورہ النسا ۳۴ ترجمہ مولانا امین احسن اصلاحی صاحب)

ترجمہ: "اگر تم میں سے دونوں (یعنی میاں بیوی) بے حیائی کے مرتکب ہوں، دونوں کو ہلکی سزا دو اور جب وہ توبہ کریں اور اپنی اصلاح کر لیں تو پھر ان سے در گزر کرو" (سورہ النسا ۔۱۶)

پھر چونکہ عورتوں کو مارنا، اسلامی تعلیمات کے خلاف معلوم ہوتا تھا، اس لئے حضرت ابن عباس نے اس کی یوں تشریح فرمائی کہ عورت کو صرف مسواک سے مارنے کی اجازت ہے (تفسیر فتح القدیر از علامہ شوکانی، جلد اول صفحہ ۴۶۲)

حضرت ابن عباس جو قرآن مجید کے اول شارح تھے، کی اس وضاحت سے تو عورتوں کو مارنے کا معاملہ عجیب دکھائی دیتا ہے۔ امام شافعی نے اس کی ایک اور دوسرے طریقے سے وضاحت کی ہے اور وہ یہ کہ عورتوں کو مارنے کی اجازت تو دی گئی ہے لیکن اچھا یہ ہے کہ کہ انہیں نہ مارا جائے(ایضا)

ان کے ساتھ ہی صحیح بخاری نے یہ حدیث بھی روایت کی ہے کہ جن لوگوں کے بارے میں یہ شکایت تھی کہ وہ اپنی بیویوں کو مارتے ہیں تو رسول اللہ نے انہیں ملامت کرتے ہوئے فرمایا کہ "کتنے شرم کی بات ہے کہ لوگ عورتوں کو مارتے بھی ہیں اور پھر ان سے مباشرت بھی کرنا چاہتے ہیں"۔ ۔ ۔

اس آیت میں در اصل میاں بیوی کے تعلقات کا سرے سے ذکر ہی نہیں بلکہ اس آیت میں اسلامی معاشرے میں عورت کی حیثیت اور مرتبے سے بحث کی گئی ہے جس لفظ یعنی "ضرب" کا ترجمہ "مارنا" کیا جاتا ہے، عربی زبان میں اس کے متعدد معنی ہیں اور جب کسی لفظ کے متعدد معنی ہوں تو سیاق و سباق کے مطابق اس کا وہ معنی اختیار کیا جاتا ہے جو سب سے زیادہ مناسب ہو۔ 

عربی زبان کے مشہور ماہر لغت سید مرتضی الحسن الزبیری نے لفظ "ضرب" کے کئی معنی بیان کئے ہیں اور فرمایا کہ جب اس لفظ کو قانونی مفہوم میں استعمال کیا جائے تو اس کا استعمال یوں ہوگا۔ ۔ ۔

ضرب القاضی علی یدہ ای حجرہ

ترجمہ: " قاضی نے اس کے باتھ پر مارا، یعنی اسے روکا"۔ ۔ ۔ ۔

تو دوستو ذہن نشین رہے کہ اس آیت میں "ضرب" کے معنی محض روکنے کے ہیں، اس معنی کی رو سے سورت النساء کی  آیت نمبر ۱۶ کے معنی یہ ہونگے۔ ۔ ۔

ترجمہ :" اور جب عورتوں سے تمہیں فحاشی کا خطرہ ہو تو تم انہیں تنبیہ کرو اور انہیں ان کے بستروں میں اکیلا چھوڑ دو اور انہیں گھر سے باہر جانے سے روک دو"۔۔۔۔۔۔

مختصر یہ کہ دین اسلام اور اس کی شریعت  میں کسی “  مرد “  کو ہرگز یہ اجازت نہیں ہے کہ وہ اپنی بیوی  کو مارے پیٹے۔ ۔

قران پاک میں سورہ النسا کی آیت ۱۶ کے مطابق اگر مردوں یا عورتوں میں سے کوئی بھی فحاشی کا ارتکاب کرے تو اسلامی معاشرہ انہیں مناسب سزا دے سکتا ہے یعنی دونوں کو سزا ملے گی، صرف عورت کو سزا دینا قرآنی تعلیمات کے خلاف ہے۔۔۔۔۔۔۔۔۔۔۔۔۔۔۔

اسلامی نظریاتی کونسل ہو یا کسی اور ملاں مولوی کا بیان ۔۔۔ لللہ اپنے خداوند متعال پر یقین رکھئے ۔۔۔ اسلام دنیا کا جدید ترین دین ہے جو رحمت ، محبت اور انسانیت کا درس دیتا ہے ۔ جو عورت اور مرد کو ایک جنس کے طور پر نہیں بلکہ اس کے تقوی اور مختلف امور پر بہتر صلاحیتوں پر ایک دوسرے پر  برتری دیتا ہے ۔۔ عورتوں کو چاہیئے کہ  جہالت اور ظلم کے خلاف آواز بلند کریں اور ایسے انسانیت سوز بیانات پر احتجاج کریں اور مردوں کے کسی بھی  رشتے میں ظلم سہنے سے انکار کر دیں ۔۔ اور یہ جرات اور بہادری صرف اسی وقت ممکن ہے جب عورتیں اپنے مقام کو اپنی تعلیم اور علم کی روشنی میں پہچانیں ۔