کراچی کے علاقے اسٹیل ٹاؤن میں دھماکے کے نتیجے میں چینی شہری سمیت 2 افراد زخمی ہوگئے، زخمیوں کو قریبی اسپتال منتقل کردیا گیا۔آئی جی سندھ نے ایس ایس پی ملیر سے فوری رپورٹ طلب کرلی ہے۔

ایس ایس پی ملیر رائو انوار کے مطابق گلشن حدید میں گرین بیلٹ میں بارودی مواد نصب کیا گیا تھا، جو زور دار دھماکے سے پھٹ گیا، جس کے نتیجے میں قریب سے گزرنے والی گاڑی کے شیشے ٹوٹ گئے اور اس میں سوارایک چینی شہری سمیت دو افرادزخمی ہوگئے۔ زخمیوں کو طبی امداد کیلئے فوری طور پر اسپتال منتقل کردیا گیا۔

ایس ایس پی رائو انوار کا کہنا ہے کہ دھماکے کے کی جگہ سے دھمکی آمیز پمفلٹ بھی ملا ہے۔

عینی شاہد کا کہنا ہے کہ دھماکے سے 20سے 25منٹ قبل گرین بیلٹ پر پریشر ککر رکھا ہوا دیکھا تھا، پریشرککرسے متعلق سڑک سے گزرنے والی پولیس موبائل کو بھی اطلاع دی لیکن کوئی ایکشن نہیں لیا گیا۔

پولیس کے مطابق دھماکا ریموٹ کنٹرول ڈیوائس سے کیا گیا، دھماکے کے نتیجے میں ایک گاڑی کو نقصان پہنچا۔

پولیس اور قانون نافذ کرنے والے ادارے کے اہلکاروں نے موقع پر پہنچ کر واقعے کی تحقیقات شروع کردی ہیں۔