ایم کیو ایم نے ڈاکٹر فاروق ستار کے گھر کے محاصرے کے خلاف یوم احتجاج کا اعلان کردیا۔ رابطہ کمیٹی کا کہنا ہے کہ عوام کاروباراورٹرانسپورٹ بندرکھیں اورپُرامن اندازمیں احتجاج ریکارڈکرائیں۔

رابطہ کمیٹی کے اعلامیے کے مطابقکسی قسم کاظلم برداشت نہیں کیاجائےگا، فاروق ستارکےگھرکےمحاصرےکی جتنی مذمت کی جائےکم ہے۔

قبل ازیں کراچی میں رینجرز نے ایم کیو ایم کے رکن سندھ اسمبلی کامران فاروقی کی گرفتاری کے لیے پی آئی بی کالونی میں واقع فاروق ستار کے گھر کا محاصرہ کیا تھا تاہم اہلکار تقریباً ڈیڑھ گھنٹے بعد محاصرہ ختم کرکے واپس چلے گئے ۔ 

رینجرز ذرائع کا کہنا ہے ایم پی اے کامران فاروقی مطلوب ہے ۔ اس کی حوالگی کے لیے ایم کیو ایم کو کئی بار کہا اور اسپیکر سندھ اسمبلی کو بھی خط لکھاگیا ۔

دوسری جانب فاروق ستار کا کہنا تھا کہ ان کے گھر میں کوئی مجرم نہیں ۔ ڈی جی رینجرز اگر اطلاع دیتےتو وہ گھر کے دروازے کھول دیتے ۔ یہ انتہائی افسوس ناک ہے،علاقے کے لوگوں کو بھی پریشان کیا گیا ۔

فاروق ستار نے سوال کیا کہ محاصرہ کس قانون کےتحت کیاگیا،اگر مجھے گرفتار کرنے آئےتھےتوکیا اسپیکراسمبلی سےاجازت لی تھی ؟