رمضان تو جہنم کی آگ سے رہائی کا مہینہ ہے لیکن وطن عزیز پاکستان میں تاجر پیشہ ہی نہیں بلکہ چھوٹے دوکاندار بھی اس ماہ مبارک میں باقاعدہ اپنی بد اعمالیوں سے جہنم خریدتے ہیں

ملک میں عوام کی کتنی بڑی تعداد ہے جنکے لیئے رمضان کی آمد نیکیوں کی بہار کی بجائے اخراجات میں اضافے کے حوالے سے سوہان روح بن جاتی ہے۔ روزمرہ کی اشیا میں کون سی چیز ہے جس میں ہوشربا اضافہ نہیں ہوتا

حکومت کو اس سے کوئی غرض نہیں کہ انکے اپنے بنائے نام نہاد رمضان بازاروں میں عوام روزہ دار کو کیسے لوٹا جاتا ہے اور کیسے گھٹیا ترین معیار کی چیزیں بھی مہنگے داموں فروخت کر دی جاتی ہیں

مختلف شہروں میں رمضان بازاروں کا آغاز کردیا گیا کئی شہروں سے اشیائے ضرورت کے نایاب ہونے اور موجود اشیاء کے غیر معیاری اور ناقص ہونے کی شکایات عام ہیں ، دوسری جانب ماہ مبارک کی آمد کے ساتھ ہی منافع خور اور گراں فروش متحرک ہوگئے۔ کیا اسی کا نام رحمتوں کا مہینہ ہے

اسلام کے نام پر حاصل کیئے جانے والے پاکستان میں ہم ہمیشہ سے دیکھتے چلے آ رہے ہیں کہ ادھر رمضان المبارک آیا اُدھر روزمرہ کی اشیا کی قیمتوں میں ہوشربا اضافہ ہوا اور روزے دار کی چیخیں نکل گئیں۔

 دوسری طرف وہ مغربی ممالک ہیں جنہیں ہم کافر اور بے دین کہتے نہیں تھکتے جہاں کرسمس اور ایسے ہی دیگر تہواروں کے مواقع پر تو اشیا کی قیمتیں کم کر ہی دی جاتی ہیں لیکن رمضان کے موقع پر بھی یہاں کے ٹیسکو ، سینس بری ۔ ویٹ روز اور ایسڈا جیسے بڑے چین سٹور نہ صرف اپنے سٹوروں میں رمضان کارنر قائم کرتے ہیں بلکہ پکانے کے تیل سمیت متعدد روزمرہ استعمال کی اشیا کو خاصی حد تک سستا بھی کر دیتے ہیں۔ 

 اب اپ ہی کہیں کہ اس تفاوت کو کیا نام دیا جائے

ہم نے تو بچپن سے یہی سنا اور پڑھا ہے کہ پروردگار فرماتا ہے کہ وہ رمضان المبارک میں شیطان کو پابند سلاسل کر دیتا ہے۔ ہاتھ باندھ کر اپنے اللہ سے پوچھوں کہ اے مالک ارض و سما اگر رمضان میں قید کر دیاجاتا ہے تو وطن عزیز میں پھر روزہ داروں کی کھال اتارنے والے، انہیں روزے کی حالت میں پانی بجلی کے بغیر رکھنے والے اور اس نیکیوں کی بہار والے مہینے میں ملاوٹ سے بھرپور اشیا بیچنے والے کون ہیں؟ کیا یہ اس شیطان سے بڑے شیطان ہیں جسکو پابند سلاسل کرنے کی نوید اللہ جی آپ نے سنائی تھی؟