مشیرخارجہ سرتاج عزیز نے کہا ہے کہ طورخم پرگیٹ کی تعمیرروکی نہیں جاسکتی۔پاکستان کسی دوطرفہ معاہدےکی خلاف ورزی نہیں کررہا۔گیٹ اپنےعلاقےمیں بنارہےہیں،کسی سےاجازت لینےکی ضرورت نہیں۔بارڈرمینجمنٹ نظام قائم ہونےتک دہشتگردی پرقابونہیں پایاجاسکتا ۔

غیر ملکی میڈیا کو انٹرویومیں مشیرخارجہ سرتاج عزیزنےکہاکہ طورخم بارڈر پرگیٹ کی تعمیر کرکے پاکستان کسی دوطرفہ معاہدے کی خلاف ورزی نہیں کررہا، گیٹ پاکستانی علاقے میں بنارہے ہیں جس کیلئے کسی سے اجازت اور تعمیر روکنے کی ضرورت نہیں۔ 

ان کاکہناتھاکہ طورخم کاراستہ کھلنےسےافغانستان کےعوام خوش ہیں، سرحدپرسفری دستاویزات کی پابندی جیسےاقدامات دونوں ممالک کے حق میں ہیں۔ 

مشیرخاجہ نےبتایاکہ بارڈرمینجمنٹ کانظام قائم ہونےتک دہشتگردی پرقابونہیں پایاجاسکتا،ساتھ ہی واضح کیاکہ پاکستان پر کسی بھی ملک نے حملہ کیا تو بھرپورجواب دیاجائےگا۔

.....................

پاکستانی اور افغانی حکام، طورخم بارڈر کے ساتھ پاکستانی علاقے میں گیٹ کی تعمیر کے حوالے سے تاحال مخمصے کا شکار ہیں۔

دونوں ممالک نے ایک روز قبل سفارتی اور عسکری رابطوں کے بعد، پاکستان کی جانب سے گیٹ کی تعمیر کی وجہ سے جھڑپ کے بعد کشیدگی کو کم کرنے پر اتفاق کیا تھا، لیکن جن شرائط پر کشیدگی کم کرنے پر اتفاق کیا گیا تھا اس حوالے سے متنازع دعوے سامنے آرہے ہیں۔

افغانستان کے سفیر ڈاکٹر عمر زاخیل وال کی سیکریٹری خارجہ اعزاز چوہدری اور چیف آف جنرل اسٹاف لیفٹیننٹ جنرل زبیر محمود حیات سے ملاقات کے بعد، پاکستانی حکام کا کہنا تھا کہ دونوں ممالک کے درمیان اس بات پر اتفاق ہوا ہے کہ افغانستان کشیدگی ختم کرکے بارڈر گیٹ تعمیر کرنے کی اجازت دے گا، جبکہ بدلے میں پاکستان طورخم بارڈر پر سرحد پار آمد و رفت کی اجازت دے گا۔

لیکن افغان سفیر نے، جنہوں نے پہلے خود سیز فائر کی تصدیق کی تھی، اپنے بیان میں کہا کہ تعمیراتی کام کی بحالی لیفٹیننٹ جنرل زبیر محمود حیات سے ملاقات میں ہونے والے اتفاق رائے کے برعکس ہے۔

انہوں نے دعویٰ کیا کہ جنرل حیات سے ملاقات میں چار نکات پر اتفاق ہوا تھا، جن میں پہلا یہ کہ فوری سیز فائر، کشیدگی میں کمی اور دونوں طرف سے طورخم پر تعینات فوجی دستے واپس بلائے جائیں گے۔

ملاقات کے دوسرے نکتے جس پر اتفاق کیا گیا وہ یہ تھا کہ قیادت کی سطح پر بات چیت، تیسرا یہ کہ معاملے کے تیزی اور خوش اسلوبی سے حل کے لیے پاک ۔ افغان ملٹری کوآرڈینیشن اجلاس بلایا جائے گا، جبکہ چوتھا نکتہ یہ تھا کہ مزید ایسے واقعات سے بچنے اور مذاکرات سے بات چیت کا حل نکالنے کے لیے تعمیری کام روک دیا جائے گا۔

افغان سفیر نے دھمکی دی کہ اگر تعمیراتی کام نہ روکا گیا تو وہ اپنے ملک واپس چلے جائیں گے۔

عمر زاخیل وال کے بیان کا جواب دیتے ہوئے پاکستانی عہدیدار نے ان پر حقائق کو توڑ مروڑ کر پیش کرنے اور ابہام پیدا کرنے کا الزام لگایا۔

قبل ازیں میڈیا بریفنگ کے دوران دفتر خارجہ کے ترجمان نفیس زکریا نے کسی کا نام لیے بغیر کہا تھا کہ ’افغانیوں کو گمراہ کیا جارہا ہے۔‘

انہوں نے زور دیتے ہوئے کہا کہ طورخم بارڈر تنازع کے حوالے سے مذاکرات کا مقصد معاملے کر پرامن طریقے سے حل کرنا اور رابطے کے فقدان کو ختم کرنا تھا۔

ان کا کہنا تھا کہ گیٹ تعمیر کا مقصد موثر بارڈر منیجمنٹ اور سرحد پار نقل و حمل کی نگرانی کرنا ہے۔

ترجمان دفتر خارجہ نے کہا کہ بارڈر تصادم کے حوالے سے پاکستان اپنے تحفظات اور خدشات سے افغان حکومت کو آگاہ کرچکا ہے، اور ساتھ ہی افغان حکومت سے مطالبہ کیا گیا ہے کہ وہ مستقبل میں ایسے واقعات سے بچنے کے لیے اقدامات اٹھائے۔

انہوں نے کہا کہ ہمارا ماننا کہ موثر بارڈر منیجمنٹ دونوں ممالک کے مفاد میں ہے

ترجمان دفتر خارجہ نے کہا ہے کہ طورخم بارڈرپرکشیدگی کوجنگ کانام نہ دیاجائے، سرحدی کشیدگی سےمتعلق بات چیت جلد کسی نتیجےپرپہنچ جائےگی،ایران کاکل بھوشن یادوسےمتعلق جواب انکےتعاون کاحصہ ہے۔

ترجمان دفترخارجہ نفیس زکریا نے ہفتہ وار بریفنگ کے دوران بتایاکہ پاک افغان سرحدپر آمد و رفت کو ضابطے میں لانے کیلئے پُرعزم ہے۔ 2250کلومیٹر طویل سرحد پر ایک نہیں چار گیٹ بنائیں جائیں گے ۔ خطے میں جو ممالک امن کے حامی نہیں وہ افغانستان کو بہکا رہے ہیں۔

انہوں نے کہا کہ پاکستان افغانستان کے درمیان کوئی باقاعدہ جنگ نہیں، سرحد وں پر ایسی جھڑپیں ہوتی رہتی ہیں، اس کشیدگی کو جنگ کا نام نہ دیا جائے،بین الاقوامی بارڈرز پر چھوٹے موٹے مسائل ہوتے رہتے ہیں جو مذاکرات سے حل کیے جاتے ہیں۔ 

ترجمان دفتر خارجہ کا کہنا تھا کہ افغانستان کے ساتھ پاکستان کے تعلقات صرف ہمسایہ ملک کے نہیں بلکہ دونوں ممالک تاریخی، مذہبی، ثقافتی تعلقات میں بندھے ہوئے ہیں۔افغان سفیر کی دفتر خارجہ اور جی ایچ کیو میں ہونے والے ملاقاتوں کا واحد مقصد کشیدگی میں کمی اور بات چیت کا آغاز کرنا تھا۔

نفیس زکریا کا کہنا تھا کہ پاکستان کا مقصد افغانستان میں امن قائم کرنا ہے ،پاکستان اور افغانستان کے درمیان طویل سرحد ہے ،اس بارڈر کی مینجمنٹ انتہائی ضروری ہے۔بارڈر مینجمنٹ ہماری انسداد دہشت گردی کی کوششوں کا حصہ ہے۔

ترجمان دفتر خارجہ نے کہا کہ افغان پاک سرحدی کشیدگی کے حوالے سے بات چیت جاری ہے،جلد ہی بات چیت کسی نتیجے پر پہنچے گی، افغانستان ہمارا پڑوسی ملک ہے اورہماری افغانستان سے وابستگی ہے افغان مہاجرین کے پاکستان میں قیام کی توسیع کے حوالے سے عالمی برادری کو قابل احترام اقدامات کرنے چاہئیں تا کہ ان کی گھروں کو واپسی یقینی بنایا جا سکے۔

طورخم بارڈر پر پاکستان اور افغانستان کی فورسز کے درمیان جھڑپوں اور کشیدگی پر امریکا نے تشویش کا اظہار کیا ہے ۔

پریس بریفنگ کے دوران امریکی محکمہ خارجہ کے ترجمان جان کربی نے کہا کہ پاکستان اور افغان فورسز کے درمیان طورخم بارڈر پر حالیہ جھڑپیں تشویش کا باعث ہیں اور ان جھڑپوں میں دونوں جانب سے جانی نقصان کی بھی اطلاعات ہیں ۔

جان کربی کا کہنا تھا کہ سرحدی علاقے میں بھاری ہتھیاروں کی موجودگی کی اطلاعات پر بھی امریکا کو تشویش ہے ۔ ہم پاکستان اور افغانستان دونوں حکومتوں پر زور دیتے رہیں گے کہ وہ سرحدی تنازعات کو حل کریں اور کشیدگی میں کمی لائیں۔

محکمہ خارجہ کے ترجمان نے کہا کہ امریکا متعدد بار کہہ چکا ہیں کہ دونوں ممالک کے درمیان اچھے تعلقات خطے کے استحکام کے لیے بنیادی اہمیت رکھتے ہیں 

پاکستان اور افغانستان کی فوجوں کے درمیان دو طرفہ شیلنگ کا دوبارہ تبادلہ ہوا ہے۔ افغان حکام نے تازہ شیلنگ میں ایک افغان گارڈ اور پانچ کے زخمی ہونے کا بتایا ہے۔

 افغانستان نے  بدھ کے روز ایک مرتبہ اِس امر کی تصدیق کی ہے کہ پاکستان نے سرحد پر بھاری ہتھیاروں سمیت مزید فوجی نفری تعینات کر دی ہے۔ اتوار کے روز سے دونوں ملکوں کے درمیان پیدا ہونے والی مسلح کشیدگی میں تین ہلاکتیں ہو چکی ہیں۔

 پاکستانی سرحد سے جڑے افغان صوبے ننگر ہار کے گورنر کے ترجمان عطا اللہ خوگیانی نے پاکستان سے مطالبہ کیا ہے کہ وہ شیلنگ کا سلسلہ فوری طور پر بند کرے کیونکہ اِس سے معاملات حل نہیں ہوں گے۔ دوسری جانب پاکستانی سکیورٹی ذرائع نے بھی نام مخفی رکھتے ہوئے تازہ شیلنگ کی تصدیق کی ہے۔

امریکہ نے کہا ہے کہ وہ پاکستان اور افغانستان کے درمیان صورتحال کو خراب ہوتا نہیں دیکھنا چاہتا اور دونوں ملکوں پر زور دیتا ہے کہ وہ کشیدگی کو پرامن طریقے سے دور کریں۔

حالیہ ہفتوں میں پاکستان اور افغانستان کے درمیان سرحد پر کشیدگی میں اضافہ دیکھا گیا ہے جب کہ رواں ہفتے اہم سرحدی گزرگاہ طورخم پر دونوں جانب کی سکیورٹی فورسز کے مابین فائرنگ کا تبادلہ بھی ہوا جس میں دونوں جانب جانی نقصان بھی ہوا ہے۔

منگل کو واشنگٹن میں معمول کی نیوز بریفنگ کے دوران پوچھے گئے ایک سوال کے جواب میں ترجمان امریکی محکمہ خارجہ جان کربی نے کہا کہ امریکہ صورتحال کا قریب سے جائزہ لے رہا ہے۔

"ہم دونوں جانب کے حکام سے رابطے میں ہیں، ہم تناؤ کے پرامن حل پر زور دیتے رہیں گے۔ ہم جھڑپیں نہیں دیکھنا چاہتے، ہم تشدد نہیں دیکھنا چاہتے، ہم صورتحال کو مزید خراب ہوتا نہیں دیکھنا چاہتے۔"

ان کا کہنا تھا کہ امریکہ کے نمائندہ خصوصی برائے افغانستان و پاکستان رچرڈ اولسن نے دونوں ملکوں کے اپنے حالیہ دورے میں عہدیداروں سے ہونے والی ملاقاتوں میں ایسے ہی جذبات کا اظہار کیا۔

پاکستان کا اپنی مشرقی سرحد پر روایتی حریف بھارت کے ساتھ بھی فائرنگ کا تبادلہ ہوتا رہا جس سے دونوں ہمسایہ ایٹمی قوتوں کے مابین بھی تناؤ میں اضافہ ہوا تھا اور اب مغربی سرحد پر افغانستان فورسز کے ساتھ فائرنگ کے تبادلے سے خطے میں کشیدگی میں اضافے کا خدشہ ظاہر کیا جا رہا ہے۔

امریکہ خطے میں کشیدگی کو کم کرنے کے لیے تمام ممالک سے اپنے تصفیہ طلب معاملات کو بات چیت کے ذریعے حل کرنے پر زور دیتا آیا ہے۔

حالیہ مہیںوں میں پاکستان کے امریکہ کے ساتھ تعلقات بھی متاثر ہوئے ہیں جس کی وجہ ایف سولہ لڑاکا طیاروں کی خریداری کے لیے امریکہ کی طرف سے پاکستان کو 40 کروڑ ڈالر سے زائد کے زر اعانت کو روکنے اور پھر فوجی امداد کو مشروط کرنے جیسے اقدام ہیں۔

پاکستان کو ملنے والی کروڑوں ڈالر کی امداد کو دہشت گردوں کے خلاف اس کی "تسلی بخش" کارروائیوں سے مشروط کیا گیا ہے۔ اسلام آباد اس پر یہ کہہ کر تنقید کرتا ہے کہ اس نے اپنے ہاں موجود تمام دہشت گردوں کے خلاف بلاامتیاز کارروائیاں شروع کر رکھی ہیں جس کے حاصل ہونے والے نتائج کو عالمی برادری نے بھی تسلیم کیا ہے۔

منگل کو محکمہ خارجہ کے ترجمان جان کربی سے پاکستانی سکیورٹی فورسز کے مبینہ طور پر انسانی حقوق کی خلاف ورزیوں میں ملوث ہونے کے ضمن میں پوچھا گیا کہ آیا "لیہے قانون" کے تحت امریکہ پاکستان کے لیے امداد روک سکتا ہے؟

ترجمان کا کہنا تھا کہ وہ پاکستان میں پیش آنے والے ایسے واقعات کے بارے خاص طور پر تو کچھ نہیں کہہ سکتے لیکن امریکہ کو دنیا بھر میں ماورائے عدالت قتل، دوران حراست اموات، جبری گمشدگیوں اور اغوا سے متعلق خبروں پر تشویش ہے۔

"ہم خطے میں باقاعدگی سے ہونے والی دو طرفہ ملاقاتوں میں انسانی حقوق سے متعلق امور بھی اٹھاتے رہے ہیں۔ ہم ایسے الزامات کی شفاف طریقے سے تحقیقات کی حوصلہ افزائی کرتے ہیں۔۔۔جو بین الاقوامی معیار کے مطابق ہوں۔"

لیہے قانون کے تحت امریکی محکمہ خارجہ اور دفاع کسی بھی دوسرے ملک کی فوجی یونٹس کو انسانی حقوق کی خلاف ورزیوں میں ملوث ہونے پر فوجی امداد دینے پر قدغن لگاتا ہے۔

ترجمان جان کربی نے کہا کہ "لیہے قانون پر امریکہ، پاکستان سے متعلق بھی عمل کرتا ہے اور پاکستانی فوج کے لیے کوئی بھی امداد نہ جا سکتی ہے اور نہ جاتی ہے اگر اس کے یونٹس کے (انسانی حقوق کی) خلاف ورزیوں میں ملوث ہونا مصدقہ ہو۔"

پاکستان، انسداد دہشت گردی میں امریکہ کا قریبی اتحادی ہے اور واشنگٹن یہ کہہ چکا ہے کہ وہ پاکستان کے ساتھ اپنی شراکت داری کو جاری رکھنے کے عزم پر قائم ہے۔

رات گئے افغان سیکیورٹی فورسز کی جانب سے دوبارہ طورخم بارڈر پر بلا اشتعال فائرنگ کردی گئی، فائرنگ کے نتیجے میں دو اہلکار زخمی ہوگئے، پاکستانی فورسز کا بھرپور جواب جاری ہے، جبکہ بارڈر پر کشیدگی برقرار ہے۔

پاکستان اور افغانستان سے محتصل طورخم بارڈر پر دن بھر خاموشی اور بلا اشتعال فائرنگ کا سلسلہ تھما رہا۔ حالات میں بہتری کے بعد لنڈی کوتل بازار سے کرفیو ہٹا دیاگیا، تاہم رات گئے ایک بار پھر افغان فورسز کی جانب سے بلا اشتعال فائرنگ کا سلسلہ شروع کردیا گیا جس کے نتیجے میں دو اہلکار زخمی ہوگئے ہیں

ذرائع کے مطابق طورخم بازار میں بدستور کرفیو نافذ ہے۔ گذشتہ روز علاقے میں غیر اعلانیہ کرفیو کے باعث طورخم بارڈر پر ہرقسم کی آمد ورفت اور تجارت بحال بھی نہیں ہوسکی ہے، جبکہ شہری آبادی کو بھی محفوظ مقام پر منتقل کردیاگیا۔واضع رہے کہ طورخم بارڈر کے راستے کو دہشتگردوں کی جانب سے استعمال کئے جانے کی شکایت سامنے آنے کے بعد پاکستانی حدود میں گیٹ کی تعمیر کی جارہی تھی جس پر افغان فورسز کی جانب سے فائرنگ کا واقع پیش آیا۔