ایان علی کو امیگریشن حکام نے ایئر پورٹ سے واپس بھیج دیا اور سپر ماڈل کو عدالت کی اجازت کے باوجود ملک سے باہر نہیں جانے دیا

ایان علی کی وطن چھوڑنے میں ایک اور مشکل سامنے آگئی ہے، امیگریشن حکام نے کراچی ایئر پورٹ پر ایان علی کو روک لیا اور انہیں ایئرپورٹ سے واپس گھر بھیج دیا۔

ذرائع سے معلوم ہوا ہے کہ امیگریشن حکام نے ایف آئی اے حکام کے کہنے پر ایان علی کو روکا۔ ایف آئی اے حکام کا کہنا ہے کہ ایان علی کا نام تاحال ای سی ایل میں موجود ہے اس لیے وہ ملک سے باہر نہیں جا سکتیں۔

ایان کو کسی کمرشل میں کام کرنے کے سلسلے میں دبئی جانا تھا، ایان کے وکیل ان کے ہمراہ ایئرپورٹ پر موجود تھے جنہوں نے انہیں ملک سے باہر بھجوانے کے حوالے سے مکمل تیاری کی ہوئی تھی۔انہیں پرواز ای کے 609 سے پونے8بجے دبئی روانہ ہونا تھا۔

ان کے وطن چھوڑنے میں ایک اور تازہ مشکل یہ سامنے آئی ہے کہ حکومت پنجاب نےایان علی کانام ای سی ایل پر ڈالنے کیلئے وزارتِ داخلہ کو ریفرنس بھیجا ہے۔

ریفرنس مقتول کسٹم انسپکٹراعجازمحمود کی بیوہ کی دائر رٹ کے جواب میں بھیجا گیا،رٹ میں ایان علی کو ملک سے باہر جانے سے روکنے کی استدعا کی گئی ہے،مقتول کی بیوہ نےبھی عدالت سےایان علی کانام ای سی ایل پرڈالنےکی استدعاکی ہے۔