ہلیری کلنٹن کے مقابلے میں ڈونلڈ ٹرمپ کی مقبولیت میں کمی ہونا شروع ہوگئی ہے، جبکہ ری پبلکن پارٹی کے درجنوں نمائندگان کی جانب سے ٹرمپ کو ووٹ نہ دینے کی مہم بھی شروع کردی گئی ہے۔ ری پبلکن ایوان نمائندگان کے اسپیکر پال رائن نے بھی ٹرمپ کی مخالفت کردی ہے۔

امریکی ٹی وی اور اخباروں کے سروے کے مطابق گزشتہ ایک ماہ کے دوران ہلیری کلنٹن کے مقابلے میں ڈونلڈ ٹرمپ کی عوامی مقبولیت میں بارہ فیصد کی کمی ہوئی ہے، جبکہ ڈونلڈ ٹرمپ خود اس بات کو تسلیم کر چکے ہیں۔اس سے پہلے صدارتی امیدوار کی نامزدگی اور انتخاب میں ووٹ کا حق رکھنے والے درجنوں ری پبلکن ڈیلیگیٹس نے ایک مہم شروع کی ہے کہ نومبر میں قومی کنوینشن میں صدارتی امیدوار کیلئے ٹرمپ کو ووٹ نہ دیا جائے۔ اور پارٹی قوانین میں ترمیم کی جائے، جبکہ یہ شق بھی شامل کی جائے گی کہ نمائندگان اپنے ضمیر کے مطابق جس بھی صدارتی امیدوار کو چاہیں ووٹ دے سکتے ہیں۔

ذرائع کے مطابق ایوان نمائندگان کے ری پبلکن اسپیکر پال رائن نے بھی ٹرمپ کی مخالفت کردی ہے، جبکہ ان کا کہنا ہے کہ پارٹی قوانین میں ترمیم کرکے ڈیلیگیٹس کو ضمیر کے مطابق اپنی پسند کے صدارتی امیدوار کو ووٹ دینے کا حق دیا جائے۔