امجد صابری قتل کیس کی تحقیقات جاری ہیں۔ کاؤنٹر ٹیررازم ڈپارٹمنٹ کی ٹیم نے قوال امجد صابری کے گھر پہنچ کر اہلخانہ سے ضروری معلومات حاصل کیں۔

ایس ایس پی انویسٹی گیشن سی ٹی ڈی نوید خواجہ کی سربراہی میں سی ٹی ڈی کی ٹیم نے امجد صابری کے اہلخانہ سےملاقات کی۔ ایس ایس پی سی ٹی ڈی نوید خواجہ کے مطابق ملاقات کے دوران امجد صابری کے قتل کے حوالے سے اہلخانہ سے کچھ اہم معلومات حاصل ہوئی ہیں، جبکہ امجد صابری کے قتل کی تحقیقات جاری ہیں، جلد ملزمان کو گرفتار کرلیا جائیگا۔

سپریم کورٹ کے چیف جسٹس انور ظہیر جمالی نے سندھ ہائی کورٹ کے چیف جسٹس سجا د علی شاہ کے صاحبزادے بیرسٹر اویس علی شاہ کے اغوا پر شدید تحفظات کا اظہار کرتے ہوئے چیف سیکر یٹر ی ، ڈی جی رینجرز ، آئی جی سندھ و دیگر کو اویس علی شاہ کی بازیابی کے لیے تمام تر وسائل بروئے کار لانے کی ہدایت کر دی ہے 

چیف جسٹس انور ظہیر جمالی نے چیف جسٹس سندھ ہائیکورٹ کے مغوی صاحبزادے اویس شاہ کوجلد سے جلد بازیاب کرانے کاحکم دیتے ہوئے کہاہے کہ اویس شاہ کے اغوا سے عام آدمی کو منفی پیغام ملاہے ، ججز اوران کے اہلخانہ عدم تحفظ کا شکارہوگئے ہیں‘پولیس بروقت کارروائی کرتی تو صورتحال مختلف ہوتی 

۔تفصیلات کے مطابق ہفتے کو سپریم کورٹ کے چیف جسٹس انور ظہیر جمالی کی سربراہی میں سپریم کورٹ کراچی رجسٹری میں اعلی سطح کے اجلاس منعقد ہوئے ۔ جس میں چیف جسٹس انور ظہیر جمالی نے چیف سیکر یٹر ی اور ہوم سیکر یٹر ی ، آئی جی سندھ اور شعبہ تفتیش کے دیگر پولیس افسران اور ڈی جی رینجرز کے ساتھ الگ الگ اجلاس کیے اور اویس علی شاہ کے اغوا کے بعد پید اہونے والی صورتحال کا جائزہ لیا‘

 دوران اجلاس متعلقہ حکام نے اویس علی شاہ ایڈووکیٹ کو بازیاب کرانے کے لیے کی جانے والی اب تک کی کارروائیوں ، پیش رفت اور اٹھائے گئے اقدامات پر چیف جسٹس کو بریفنگ دی ۔ اس موقع پر چیف جسٹس انور ظہیر جمالی نے اویس علی شاہ کے اغوا پر شدید تحفظات کا اظہار کیا اور تمام متعلقہ حکام کو ہدایت جاری کی کہ وہ اویس علی شاہ کی بازیابی کے لیے تمام تر وسائل کو بروئے کار لائیں ۔ 

وزیر اعلیٰ سندھ سید قائم علی شاہ نے معروف قوال امجد صابری کے اہل خانہ کے لیے ایک کروڑ روپے معاوضے کا اعلان کرتے ہوئے کہا ہے کہ امجد صابری کا قتل کراچی کے علاقے لیاقت آباد میں ہوا ہے جہاں کوئی پرندہ بھی پر نہیں مار سکتا‘ دہشت گرد اویس شاہ کے اغوا کی صورت میں عدلیہ پر دباؤ ڈالنےکی کوشش کررہے ہیں‘ میں کوئی پیر فقیر نہیں ہوں جو یہ بتادوں کہ قاتل کب پکڑے جائیں گے مگرامجدصابری قتل کیس سے متعلق اہم شواہد مل گئے ہیں‘قاتل جلدکٹہرے میں ہوں گے ۔

 انہوں نے یہ بات ہفتہ کو سندھ اسمبلی میں بجٹ پر خطاب کرتے ہوئے کہی ۔ انہوں نے کہا کہ اگر امجد صابری کی بیوہ چاہیں تو انہیں مناسب نوکری بھی فراہم کی جائے گی‘ ان کے بچوں کے تعلیمی اخراجات بھی حکومت سندھ برداشت کرے گی‘ چیف جسٹس سندھ ہائی کورٹ کے صاحبزادے اویس شاہ کے اغواء کا معاملہ بھی جلد حل ہو جائے گا اور انہیں بحفاظت بازیاب کرا لیا جائے گا‘دہشت گردوں کی کوشش ہے کہ عدلیہ کو ہراساں کیا جائے ‘دہشت گردوں کی ہم سےازلی دشمنی ہے ‘ وہ ہمیں بھی پریشان کرنا چاہتے ہیں لیکن ہم اویس شاہ کو بازیاب کرا لیں گے ‘انہوں نے کہاکہ اویس شاہ کے اغواء کے سلسلے میں 9 رکنی کمیٹی بنا دی گئی ہے ۔ یہ کمیٹی چیف جسٹس سے ملاقات کرے گی اور اویس شاہ کی بازیانی کی کوششوں کی نگرانی کرے گی‘انہوں نے کہا کہ امجد صابری کے قتل اور اویس شاہ کے اغواء کی تحقیقات کے لیے سینئر افسران پر مشتمل تین ٹیمیں بنائی گئی ہیں ۔ ان افسروں میں سلطان خواجہ ، منیر احمد شیخ ، نوید خواجہ ، راجہ عمر خطاب اور دیگر شامل ہیں ‘ ایک نگراں ٹیم بھی بنائی گئی ہے ، جو ڈی جی رینجرز اور آئی جی سندھ پر مشتمل ہے ‘ دونوں کیس جلد حل کر لیے جائیں گے ۔  

وزیراعلیٰ سندھ سید قائم علی شاہ نے سندھ اسمبلی کے اجلاس سے خطاب کرتے ہوئے عالمی شہرت یافتہ قوال امجد صابری کے قاتلوں کو پکڑنے کے حوالے سے اہم پیشرفت کا دعویٰ کیا۔

سندھ اسمبلی کے بجٹ اجلاس سے خطاب میں قائم علی شاہ نے کہا کہ قانون نافذ کرنے والے اداروں نے امجد صابری کے معاملے میں اہم سراغ حاصل کرلیے ہیں اور قاتلوں کو جلد پکڑ لیا جائے گا۔

وزیراعلیٰ سندھ نے امجد صابری کے اہل خانہ کے لیے ایک کروڑ روپے امداد کابھی اعلان کیا، جبکہ مقتول کی اہلیہ کو سرکاری ملازمت دینے کی بھی پیش کش کی۔

خطاب کے دوران وزیراعلیٰ قائم علی شاہ کی زبان بھی کئی بار پھسلی اور انہوں نے امجد صابری کی جگہ جنید جمشید کو 'شہید' کہہ دیا جبکہ ایک شعر بھی غلط پڑھا۔

قائم علی شاہ نے اپنے خطاب میں چیف جسٹس سندھ ہائی کورٹ سجاد علی شاہ کے بیٹے اویس شاہ کے اغواکو گھناؤنا فعل قرار دیا اور مغوی کے بارے میں معلومات فراہم کرنے والے کے لیے ایک کروڑ روپے انعام کا اعلان بھی کیا۔

ان کا کہنا تھا کہ اویس شاہ کی بازیابی کے لیے کمیٹی بنادی گئی ہے اور اس حوالے سے بھرپور کوششیں کی جارہی ہیں۔

قائم علی شاہ کا کہنا تھا کہ اویس شاہ کا اغواء عدلیہ پردباؤ ڈالنے کی ایک کوشش ہوسکتی ہے۔

وزیر اعلیٰ سندھ نے اپنے خطاب میں گشتہ برس مارچ میں متحدہ قومی موومنٹ (ایم کیو ایم ) کے مرکز نائن زیرو پر رینجرز کے چھاپے کا بھی ذکر کیا، ان کا کہنا تھا کہ آج رینجرز کی تعریف کرنے والے کل 'گورینجرز گو' کے نعرے لگارہے تھے۔

وزیراعلیٰ سندھ کا کہنا تھا کہ نائن زیرو سے جولوگ پکڑے گئے ان کی فہرست رینجرز نے جاری کی تھی۔

قائم علی شاہ نے صحافی ولی بابر کے قتل اور اس کے مجرموں کے مقدمہ کا احوال بھی سنایا۔

طویل خطاب پر اپوزیشن کے شورشرابے کے جواب میں قائم علی شاہ نے کہا کہ ابھی 30 سے 40 منٹ اور بولوں گا، 'ابھی عشق کے امتحان اور بھی ہیں۔'

انہوں نے ایم کیو ایم پر تنقید کرتے ہوئے کہا کہ سابق صدر جنرل (ر) پرویز مشرف پرحملہ کرنے والوں کو بھی ہم نے پکڑا، یہ لوگ کہتے ہیں کہ ہم کراچی کے لیے نہیں سوچتے۔

انھوں نے مزید کہا کہ آج بھی ہم سے سوال کیا جاتا ہے کہ 12 مئی کی تحقیقات کیوں نہیں کیں، اس دن ہم پرپل سے فائرنگ کی گئی تھی۔

قائم علی شاہ نے کراچی آپریشن کا بھی ذکر کیا اور کہا کہ اس دوران 400 پولیس اہلکار اور 40 رینجرز اہلکار جان کی بازی ہار چکے ہیں۔

امجد صابری کا قاتل کون؟؟ قتل کی اُلجھی ڈور کا پولیس کو سرا مل گیا ،سُرجانی ٹاؤن سے قتل میں ملوث شخص پکڑا گیا ، گرفتار ملزم نے اہم انکشافات کئے ہیں ، ملزم کا تعلق ایک سیاسی جماعت سے ہے،گرفتار شخص کی نشاندہی پر چھاپوں کا سلسلہ جاری ہے۔

محکمہ انسداد دہشت گردی نے کراچی کے علاقے سرجانی ٹاؤن سے سیاسی جماعت سے تعلق رکھنے والے ایک ملزم کو گرفتار کر لیا ہے۔ سی ٹی ڈی کا دعویٰ ہے کہ ملزم نے امجد صابری قتل کیس سے متعلق اہم انکشافات کئے ہیں۔

ذرائع کے مطابق محکمہ انسداد دہشت گردی نے امجد صابری قتل کیس کے سلسلے میں سرجانی ٹاؤن میں ٹارگٹڈ کارروائی میں ایک ملزم کو گرفتار کر لیا ہے ۔ سی ٹی ڈی ذرائع کے مطابق ملزم نے امجد صابری قتل کیس کے حوالے سے اہم انکشافات کئے ہیں تاہم ملزم کا نام ظاہر نہیں کیا گیا۔ 

دوسری طرف کراچی کے مختلف علاقوں میں پولیس نے کارروائی کرتے ہوئے 3 ملزمان گرفتار کر لیے۔ سہراب گوٹھ میں مبینہ مقابلے میں ڈاکو ہلاک ہو گیا۔ پولیس کے مطابق لیاری دبئی چوک پر کارروائی کی گئی۔ کارروائی میں گینگ وار بابا لاڈلا گروپ کو ملزم وحید گرفتار کیا گیا۔

منگھو پیر سے اسٹریٹ کرائم میں ملوث 2 ملزمان گرفتار کے لئے گئے۔اُدھر سپر ہائی وے کے قریب جنجال گوٹھ میں مبینہ پولیس مقابلہ ہوا ہے جس میں ڈاکو ہلاک ہو گیا۔نیو کراچی رحمانیہ موڑ کے قریب فائرنگ سے ایک شخص جاں بحق ہو گیا۔

معروف قوال امجد صابری کے قتل کیس نے اُس وقت ایک نیا موڑ اختیار کرلیا جب ایک خاتون نے دعویٰ کیا کہ پولیس کی جانب سے جس مبینہ حملہ آور کا خاکہ جاری کیا گیا وہ دراصل ان کا بیٹا ہے جو گذشتہ 3 سالوں سے لاپتہ ہے۔

خاتون کے اس دعویٰ سے ایسا معلوم ہوتا ہے کہ مذکورہ شخص کو جلد ہی چند دنوں میں گرفتار کرلیا جائے گا۔

کلفٹن کے قریب اَپر گزری کی رہائشی حمیدہ خاتون اس حوالے سے پٹیشن دائر کرنے گذشتہ روز سندھ ہائی کورٹ پہنچیں اور اس موقع پر میڈیا کو بتایا کہ انھوں نے 2014 میں علاقہ پولیس اسٹیشن میں اپنے بیٹے ناصر کی گمشدگی کی ایف آئی آر بھی درج کروائی تھی۔

بعدازاں خاتون نے ڈان خبار سے بات کرتے ہوئے بتایا کہ وہ سندھ ہائی کورٹ میں اپنے بیٹے کی سیکیورٹی اور بازیابی کے لیے پٹیشن دائر کروانے آئی تھیں لیکن ایسا کر نہیں سکیں کیونکہ عدالت کا وقت ختم ہوگیا تھا۔

انھوں نے کہا، 'اب میں کل صبح درخواست جمع کرواؤں گی'۔

حمیدہ خاتون نے مزید کہا کہ ابھی تک انھوں نے اس حوالے سے کسی وکیل سے رابطہ نہیں کیا، ان کا کہنا تھا 'میرا وکیل اللہ ہے'۔

انھوں نے بتایا کہ ان کے شوہر بیروزگار ہیں۔

ایک سوال کے جواب میں انھوں نے کہا کہ جب ان کا بیٹا پراسرار طور پر گمشدہ ہوا، تو اس وقت وہ بھی بیروزگار تھا۔

حمیدہ خاتون نے رندھی ہوئی آواز میں بتایا، 'میں نے جب سے ٹی وی پر خاکہ دیکھا ہے، میں پوری رات سو نہیں سکی'۔

ان کا مزید کہنا تھا کہ 'میں صابری صاحب کے قتل کی شدید مذمت کرتی ہوں لیکن مجھے پورا یقین ہے کہ میرے بیٹے کا اس واقعے سے کوئی لینا دینا نہیں ہے۔'

یاد رہے کہ رواں ماہ 22 جون کو معروف قوال امجد صابری کی گاڑی پر لیاقت آباد نمبر 10 کے علاقے میں نامعلوم افراد کی جانب سے فائرنگ کی گئی تھی جس کے نتیجے میں وہ موقع پر ہی ہلاک ہوگئے۔

امجد صابری کی تدفین پاپوش نگر قبرستان میں پیرحیرت شاہ وارثی کے مزار کے احاطے میں کی گئی، امجد صابری کے والد غلام فرید صابری کی قبر بھی اسی احاطے میں موجود ہے۔

ان کے جنازے میں ہزاروں کی تعداد میں لوگ شریک ہوئے اور اس دوران ہر آنکھ اشکبار نظر آئی۔

......................