قاتلانہ حملے میں ہلاک ہونے والے معروف قوال امجد صابری کے بھائی ثروت صابری کا کہنا ہے کہ ان کے بھائی کو کسی قسم کی دھمکیاں نہیں مل رہی تھیں۔

ثروت صابری نے آرمی چیف جنرل راحیل شریف سے اپنے بھائی کے قاتلوں کی گرفتاری کا مطالبہ بھی کردیا۔

یاد رہے کہ صابری گھرانے سے تعلق رکھنے والے غلام فرید صابری کے صاحبزادے اور معروف قوال امجد صابری کو گذشتہ روز کراچی کے علاقے لیاقت آباد میں فائرنگ کا نشانہ بنایا گیا تھا، جس کے نتیجے میں وہ موقع پر ہی ہلاک ہوگئے تھے۔

امجد صابری پر قاتلانہ حملے کے واقعے کی ایف آئی آر تاحال درج نہیں کی گئی۔

امجد صابری کے بھائی ثروت صابری نے میڈیا سے گفتگو میں کہا کہ ان کے بھائی کا قتل پاکستان میں قوالی کا نقصان ہے لیکن اس طرح سے قوالی کا باب بند نہیں ہوسکتا کیونکہ یہ بزرگان دین کی دَین ہے، یہ سلسلہ 11 سو سال سے چل رہا ہے اور چلتا رہے گا۔

اس سے قبل رینجرز افسران نے امجد صابری کے گھر کا دورہ کیا اور ان کا موبائل فون اپنی تحویل میں لے لیا تاکہ فون کالز کا رکارڈ چیک کیا جاسکے۔

دوسری جانب امجد صابری کی میت کو چھیپا کے سرد خانے سے ان کے گھر منتقل کردیا گیا، اس موقع پر رقت آمیز مناظر دیکھنے میں آئے اور لوگ دھاڑیں مار مار کر روتے رہے ۔

امجد صابری کی نماز جنازہ دوپہر ایک بجے لیاقت آباد روڈ پر ارم بیکری کے سامنے ادا کی جائے گی۔

اہلخانہ کے مطابق ان کی تدفین پاپوش نگر قبرستان میں پیرحیرت شاہ وارثی کے مزار کے احاطے میں کی جائے گی، امجد صابری کے والد غلام فرید صابری کی قبر بھی اسی احاطے میں موجود ہے۔