امریکی سینیٹر برنی سینڈرز نے پہلی مرتبہ اعلان کیا ہے کہ وہ نومبر میں مجوزہ صدارتی انتخابات میں ہلیری کلنٹن کے حق میں ووٹ ڈالیں گے۔ ڈیموکریٹک پارٹی کی ممکنہ خاتون امیدوار کے پارٹی کے اندر اب تک کے سخت ترین حریف نے یہ بات نشریاتی ادارے ایم ایس این بی سی کے ساتھ ایک گفتگو میں کہی۔

 سینڈرز کو بائیں بازو کی پالیسیوں کی حمایت کی وجہ سے زبردست مقبولیت حاصل ہوئی اور اُنہوں نے کلنٹن کے ساتھ زبردست مقابلہ کیا۔ اگرچہ ہلیری کلنٹن کو جولائی میں اپنی جماعت کی طرف سے صدارتی امیدوار بننے کے لیے پہلے ہی مندوبین کی مطلوبہ تعداد کی حمایت حاصل ہو چکی ہے تاہم سینڈرز ابھی تک سرکاری طور پر کلنٹن کے ساتھ مقابلے سے دستبردار نہیں ہوئے۔