سیکریٹری الیکشن کمیشن بابر یعقوب کہتے ہیں الیکشن کمیشن کے فعال ہونے تک ریفرنسزپرسماعت نہیں ہو سکتی۔ادھر وفاقی حکومت نے وزیر اعظم کے خلاف پیپلز پارٹی اور تحریک انصاف کےالیکشن کمیشن میں ریفرنسز کےدفاع کا فیصلہ کر لیا ہے ۔

سیکریٹری الیکشن کمیشن بابر یعقوب نے اسلام آباد میں صحافیوں کوبتایاکہ الیکشن کمیشن غیر فعال ہے، کئی نوٹیفیکیشن بھی رکے ہوئے ہیں، الیکشن کمیشن کےغیرفعال ہونےپر حکومت کو تحریری طورپرآگاہ کرچکے۔

بابر یعقوب نےتصدیق کی کہ پی ٹی آئی اور پیپلز پارٹی کے ریفرنسز موصول ہو گئے ہیں لیکن کمیشن کی فعالی تک ریفرنسز پر سماعت نہیں ہو سکتی۔ 

ادھرذرائع کے مطابق،وزیراعظم کے خلاف پیپلز پارٹی اور پی ٹی آئی کے ریفرنسز کے معاملے پرمسلم لیگ ن کا غیر رسمی مشاورتی اجلاس ہوا جس میں ریفرنسز کا قانونی بنیادوں پر بھرپور دفاع کرنے کافیصلہ کیاگیا، اس سلسلے میں جلد وکلا کی ٹیم کا فیصلہ بھی کرلیاجائےگا۔

ذرائع بتاتے ہیں کہ ڈاکٹروں کی ہدایت کے مطابق عید کے بعد وزیر اعظم کی وطن واپسی کا فیصلہ ہو گااور وطن واپسی پر لاہور میں ان کابھرپور استقبال کیاجائےگا۔