عالم لوہار کی وفات

عالم لوہار یکم مارچ 1928ءکو موضع آچھ ضلع گجرات میں پیدا ہوئے تھے۔ ان کے والد ان کی خوش الحانی کی وجہ سے انہیں قاری بنانا چاہتے تھے مگر ان کا اپنا رجحان لوک داستانیں گانے کی طرف تھا چنانچہ وہ اپنے اس شوق کی تکمیل کے لئے اپنا گھر چھوڑ کر تھیٹریکل کمپنیوں سے وابستہ ہوگئے اور نہایت کم عمری میں بہت مقبول ہوگئے۔

قیام پاکستان کے بعد انہوں نے ریڈیو پاکستان اور پھر پاکستان ٹیلی وژن سے بھی اپنے فن کا جادو جگایا اور پاکستان کے مقبول ترین لوک گلوکاروں میں شمار ہونے لگے۔ ان کے فن کے قدردانوں میں صدر ایوب خان بھی شامل تھے۔

* 3 جولائی 1979ء کو محمد عالم لوہار مانگا منڈی کے قریب ٹریفک کے ایک حادثے میں جاں بحق ہوگئے۔

------------------------------------------------------------------------------------------

حسام قاضی کی وفات

٭3 جولائی 2004ء کو پاکستان ٹیلی وژن کے معروف اداکار حسام قاضی کراچی میں وفات پاگئے۔

حسام قاضی 1961ء میںکوئٹہ میں پیدا ہوئے تھے۔ انہوں نے اپنے فنی کیریئر کا آغاز دوست محمد گشکوری کے ڈرامے خالی ہاتھ سے کیا تھا۔ تاہم ان کی ملک گیر شہرت کا نقطہ آغاز کاظم پاشا کے ڈرامہ سیریل ’’چھائوں‘‘ کو تسلیم کیا جاتا ہے۔ ان کے دیگر معروف سیریلز میں ماروی، دیس پردیس، لب دریا، ایمرجنسی وارڈ، کشکول، گھرانہ اور درد کے فاصلے کے نام شامل ہیں۔ ان کی آخری زیر تکمیل ڈرامہ سیریل ’’مٹی کی محبت‘‘ تھی۔حسام قاضی کوئٹہ کے ریلوے ہائوسنگ سوسائٹی کے قبرستان میں آسودۂ خاک ہیں۔

------------------------------------------------------------------------------------------

وسیم حسن راجہ کی پیدائش

٭ پاکستان کے سابق آل رائونڈر ٹیسٹ کرکٹر وسیم حسن راجہ  3 جولائی 1952ء کو ملتان میں پیدا ہوئے تھے۔

1973ء میں انہوں نے نیوزی لینڈ کے خلاف اپنے ٹیسٹ کیریئر کا آغاز کیا اور مجموعی طور 57 ٹیسٹ میچوں میں پاکستان کی نمائندگی کی۔ انہوں نے مجموعی طور پر2821 رنز اسکور کئے جن میں 4 سنچریاں اور 18 نصف سنچریاں شامل تھیں۔ اس کے علاوہ انہوں نے 35.80 کی اوسط سے 51 وکٹیں بھی حاصل کیں۔ انہوں نے 54 ایک روزہ بین الاقوامی میچ بھی کھیلے اور مجموعی طور پر 728 رنز اسکور کئے۔ پاکستان کے مشہور کھلاڑی رمیز راجہ ان کے چھوٹے بھائی ہیں۔

٭23 اگست 2006ء کو وسیم حسن راجہ لندن میں ایک کلب میچ کے دوران دل کا دورہ پڑنے کی وجہ سے وفات پاگئے۔