برطانیہ کے اینڈی مرے نے کینیڈا کے میلوش راونیچ کو شکست دے کر دوسری مرتبہ ومبلڈن چیمپئن شپ کا ٹائٹل اپنے نام کرلیا ہے، یہ برطانوی ٹینس اسٹار کے کیرئیر کا تیسرا گرینڈ سلیم ہے ۔

ومبلڈن کے فائنل میں سیکنڈ سیڈ اینڈے مرے نے سکستھ سیڈ میلوش راونچ کیخلاف اسٹریٹ سیٹس میں تو کامیابی ضرور حاصل کی، لیکن پونے 3 گھنٹے جاری رہنے والے میچ میں انہیں بھرپور مزاحمت کا سامنا رہا ۔

پہلے سیٹ میں تو مرے نے صرف 4 گیمز ڈراپ کرتے ہوئے کامیابی حاصل کی لیکن دوسرے اور تیسرے سیٹ کا فیصلہ ٹائی بریکر پر ہوا ، دوسرے سیٹ کے ٹائی بریکر پر ان کا اسکور 7۔ 3 جبکہ تیسرے سیٹ کے ٹائی بریکر پر ان کا اسکور7 ۔2 رہا ۔

یوں اینڈی مرے نے یہ فائنل 6 ۔ 4 ، 7 ۔6 اور 7 ۔6 کے اسکور سے جیت کر اپنے کیرئیر کا تیسرا گرینڈ سلیم ٹائٹل اپنے نام کیا،وہ اس سے قبل 2012ء میں یو ایس اوپن اور 2013ء میں ومبلڈن جیت چکے ہیں، اس سال انہیں آسٹریلین اوپن اور فرنچ اوپن فائنلز میں شکست ہوئی تھی ۔