پاکستان نے مصباح الحق کی نصف سنچری کی بدولت انگلینڈ کے خلاف پہلے ٹیسٹ میچ میں چائے کے وقفے کے بعد 4 وکٹوں کے نقصان پر 174 رنز بنا لیے ہیں۔

پاکستان اور انگلینڈ کے درمیان چار ٹیسٹ میچوں کی سیریز کا پہلا میچ آج لارڈز کرکٹ گراؤنڈ میں کھیلا جا رہا ہے جہاں پاکستان کے کپتان مصباح الحق نے بیٹنگ کیلئے سازگار وکٹ پر ٹاس جیت کر پہلے بلے بازوں کو آزمانے کا فیصلہ کیا ہے۔

کپتان مصباح الحق نے کہا کہ وکٹ بیٹنگ کیلئے سازگار نظر آ رہی ہے اسی لیے ہم ٹاس جیت کر پہلے بیٹنگ کر رہے ہیں۔

لارڈز گزشتہ کچھ عرصے سے بیٹنگ کیلئے سازگار تصور کی جاتی ہے اور یہی وجہ ہے کہ اس وکٹ پر بھی بڑی تعداد میں رنز بننے کا امکان ہے۔

اوپنرز محمد حفیظ اور شاند مسعود محتاط انداز میں اننگز کا آغاز کیا اور ابتدائی دس اوورز میں کوئی وکٹ نہ گرنے دی لیکن اس دوران شان مسلسل جدوجہد کرتے نظر آئے۔

بالآخر 38 کے مجموعی اسکور پر شان مسعود کی ہمت جواب دے گئی اور سات رنز بنانے کے بعد پویلین لوٹے۔

محمد حفیظ اچھی فارم میں نظر آئے لیکن ایک غیر ضروری شاٹ کھیلنے کی کوشش میں 40 رنز کی اننگز کھیل کر وکٹ گنوا بیٹھے۔

اس کے بعد اظہر علی اور یونس وکٹ پر یکجا ہوئے اور کھانے کے وقفے تک مزید کوئی وکٹ نہ گرنے دی، جب کھانے کا وقفہ ہوا تو پاکستان نے دو وکٹ کے نقصان پر 76 رنز بنائے تھے تاہم وقفے کے فوری اظہر علی ایک رن کا اضافہ کرکے آؤٹ ہوئے۔

یونس خان اور مصباح الحق نے ٹیم کا اسکور آگے بڑھایا اور دونوں تجربہ کار کھلاڑیوں نے انگلینڈ کے باؤلرز کا مقابلہ کیا لیکن یونس خان 134 کے مجوعے پر معین علی کو کیچ دے کر پویلین لوٹ گئے، وہ 33 رنز بنا کر آؤٹ ہونے والے چوتھے کھلاڑی تھے۔

مصباح الحق کا ساتھ دینے کے لیے اسد شفیق میدان میں آئے اور چائے کے وفقے تک دونوں کھلاڑیوں نے مزید کوئی وکٹ نہیں گرنے دی جبکہ اس دوران کپتان نے اپنی نصف سنچری بھی مکمل کی۔

پاکستان نے چائے کے وقفے تک 4 وکٹوں پر 158 رنز بنا لیے تھے۔

مصباح الحق چائے کے وقفے کے بعد سست روی سے بیٹنگ کرتے ہوئے 55 رنز بنا کرکھیل رہے ہیں جبکہ اسد شفیق نے 21 رنز بنالیے ہیں اور پاکستان کا اسکور 4 وکٹوں پر 174 رنز ہے۔

انگلینڈ کی جانب سے کرس ووکس نے دو وکٹیں حاصل کیں۔