چنبیلی پاکستان کا قومی پھول قرار دے دیا گیا

قیام پاکستان کے بعد حکومت پاکستان نے نرگس کے پھول اور چیتے کو ملک کا قومی نشان قرار دیا تھا مگر نرگس کا پھول ملک کے مشرقی حصے میں اور چیتا ملک کے مغربی حصے میں نہیں پایا جاتا تھا اس لیے حکومت پاکستان نے 15 جولائی 1961ء کو چنبیلی کو ملک کا قومی نشان قرار دے دیا۔

چنبیلی کو ملک کا قومی نشان قرار دیتے ہوئے وزارت داخلہ کے ایک ترجمان نے اپنے اعلان میں کہا کہ اس پھول کو یہ اعزاز اس لیے بخشا گیا ہے کیونکہ یہ ملک کے دونوں حصوں میں پیدا ہوتا ہے اور ملک کے قریباً تمام علاقوں کے باشندے اس پھول سے مساوی طور پر جذباتی لگائو رکھتے ہیں۔ پاکستانی ادب میں اس کو نمایاں مقام حاصل ہے اور شاعری اور مصوری نے اس پھول کو لافانی بنا دیا ہے

------------------------------------------------------------------------------------------

چوہدری محمد علی کی پیدائش

پندرہ جولائی 1905ء پاکستان کے سابق وزیراعظم چوہدری محمد علی کی تاریخ پیدائش ہے۔

چوہدری محمد علی ننگل انبیا، تحصیل نکودر ضلع جالندھر میں پیدا ہوئے تھے۔ 1928ء میں انڈین آئوٹ اینڈ اکائونٹس سروس میں شامل ہوئے اور تیزی سے ترقی کے مراحل طے کرتے ہوئے ایڈیشنل سیکریٹری کے عہدے تک پہنچے۔ قیام پاکستان سے پہلے جب عارضی حکومت میں لیاقت علی خان وزیر خزانہ بنے تو انہوں نے بطور مشیر اعلیٰ ان کاوہ بجٹ تیار کرنے میں بڑی مدد کی جسے غریبوں کا بجٹ کہا جاتا ہے۔ قیام پاکستان کے بعد وہ پاکستان کے پہلے سیکریٹری جنرل اور 1951ء میں وفاقی وزیر خزانہ بنے۔ 1955ء میں دستور ساز اسمبلی کے رکن منتخب ہوئے اور 11 اگست 1955ء سے 12 ستمبر 1956ء تک پاکستان کے وزیراعظم رہے۔ ان کے عہد حکومت کا سب سے بڑا کارنامہ پاکستان کے پہلے آئین کی منظوری تھا۔

ایوب خان کے مارشل لاء کے نفاذ کے بعد وہ عملی سیاست سے کنارہ کش ہوگئے۔ تاہم محترمہ فاطمہ جناح کے صدارتی انتخابات میں انہوں نے فعال کردار ادا کیا۔انہوں نے تحریک پاکستان کے موضوع پر Emergence of Pakistan کے نام سے ایک کتاب بھی تحریر کی تھی جس کا ترجمہ ’’ظہور پاکستان‘‘ کے نام سے اشاعت پذیر ہوچکا ہے۔

یکم دسمبر 1980ء کو چوہدری محمد علی کراچی میں وفات پاگئے 

------------------------------------------------------------------------------------------

ایک دن میں سب سے زیادہ پودے لگانے کا عالمی ریکارڈ

15جولائی 2009ء کو پاکستان میں ضلع ٹھٹھہ کی ساحلی پٹی پر قائم تاریخی شہر کیٹی بندر کے ساحل پر ایک دن میں تمر کے 541176 پودے لگا کر ایک نیا عالمی ریکارڈ قائم کیا گیا۔ شجر کاری کی اس مہم کا اہتمام وفاقی وزارت ماحولیات نے کیا تھا۔ اس مہم میں 400 تربیت یافتہ مقامی رضاکاروں نے حصہ لیا۔ اس موقع پر وفاقی وزیر ماحولیات حمید اللہ جان آفریدی نے بتایا کہ پاکستان میں 2009ء کے سال کو ماحولیات کے سال کے طور پر منایا جارہا ہے۔ سمندری ساحلوں اور جزیروں میں تمر کے جنگلات سمندری طوفانوں کے خاتمے میں بڑی مدد کرتے ہیں اور مچھلی کی افزائش میں نرسری کا کردار ادا کرتے ہیں۔ ایک دن میں سب سے زیادہ پودے لگائے جانے کا عالمی ریکارڈ اس سے قبل بھارت کے پاس تھا جہاں جون 2009ء میں ایک دن میں 447874 پودے لگائے گئے تھے۔

شجرکاری کی اس مہم کے موقع پر گنیز بک آف ورلڈ ریکارڈ کے نمائندے جناب عادل احمد بھی موجود تھے جنہوں نے ایک دن میں سب سے زیادہ پودے لگائے جانے کے اس نئے عالمی ریکارڈ کی تصدیق کی اور وفاقی وزیر ماحولیات کو اپنے ادارے کی جانب سے سرٹیفکیٹ بھی جاری کیا