بریکنگ نیوز تو ہمارے پاکستانی وڈیوز پر اس تواتر سے چلتی ہیں کہ کسی وزیر کا کھانسنا بھی بریکنگ نیوز ہے بلکہ میں ایسی نیوز کو ہیڈ بریکنگ نیوز کہتا ہوں تا ہم ایسی بے تُکی خبروں کے درمیان ایسی خبریں بھی آتی ہیں جو صرف برکنگ نیوز نہیں بلکہ ہارٹ بریکنگ نیوز ہوتی ہیں اور قندیل بلوچ کا قتل بھی ایسی کی خبر تھا

قندیل جب سے منظر عام پر آئی ہے میں ہمیشہ یہ سوچا کرتا تھا کہ اس خاتون نے اس روشنیوں کی دنیا میں قدم نہ جانے کن حالات میں، کن مجبوریوں میں اور کن مشکلات میں رکھا ہو گا۔ ٹی وی کے پروگراموں کی ریٹنگ بڑھانے والوں نے اس سے ہر وہ سوال کیا جو شاید وہ عام ماڈل گرل سے نہ کر پاتے لیکن کسی نے کبھی یہ جاننے کی کوشش نہ کی کہ وہ اس میدان میں کیوں اور کیسے آئی؟

ہم مجرم کو ختم کرنا چاہتے ہیں جُرم کو نہیں لیکن عدل کا تقاضہ سزا کے ساتھ یہ بھی ہے کہ مجرم کو سدھرنے کا موقع اور وسائل مہیا کیئے جائیں اور ساتھ ہی جُرم کے خاتمے کے اقدامات بھی کیئے جائیں

اس وقت فیس بُک سمیت تمام سوشل میڈیا پر قندیل بلوچ کا قتل ہاٹ کیک کی طرح ہے

اور اسوقت جب میں یہ سطور لکھ رہا ہوں تو سامنے ٹی وی پر ایک اور بریکنگ نیوز نمودار ہوئی ہے

ماڈل گرل قندیل بلوچ کو شاہ صدر دین قبرستان، ڈیرہ غازی خان میں سپرد خاک کردیا گیا، اس سے قبل ان کی نماز جنازہ میں لواحقین، عزیز و اقارب اور مقامی لوگوں نے شرکت کی

میں نے یہ کوئی انہونی بات نہیں کی۔ ہمارے معاشرے میں آئے دن ایسے واقعات ہوتے ہیں۔ شاید آپ ماڈل ٹاؤن لاہور کا چند برس پہلے کا وہ واقعہ نہ بھولے ہوں جہاں ایک بھائی نے اپنی بہن کو دس سال سے تہہ خانے میں مقید رکھا تھا اور اسے جنسی تشدد کا نشانہ بناتا ہے۔ اسلام آباد کی اُس سوتیلی بیٹی کی کہانی بھی بہت پرانی نہیں جہاں ایک مکروہ باپ اپنی سوتیلی بیٹی کو جنسی پیاس بجھانے کے لیئے استعمال کرتا تھا۔ ایسے درجنوں نہیں سینکڑوں واقعات ہیں ہمارے نام نہاد اسلامی معاشرے میں اور ہم انہیں ستار العیوب کا سہارا لیکر قالین کے نیچے دفن کر دیتے ہیں اور یوں جُرم صاحب اولاد ہوتا رہتا ہے

کچھ احباب اس قتل کا محرک میڈیا کو بھی قرار دیتے ہیں ۔ 

بےشک میڈیا اسکا ذمیدار ہے لیکن اسکی ایک سے زیادہ وجوہات ہیں۔ یہ جسے عزت کے نام پر قتل کہا جارہا ہے دراصل عزت کا قتل ہے میری نظر میں۔ وہ سب مرد جنہوں نے قندیل کو استعمال کیا اور اسکے ساتھ فلرٹ کیا انکو کون سزا دے گا؟ اس معاشرے میں تو اس موضوع  پر گفتگو بھی حرام سمجھی جاتی ہے۔ رہا میڈیا تو سچ کہیں کیا ہمارے ملک کا میڈیا واقعی میڈیا ہے؟ سارے معاشرے کی طرح ایک شُتر بے مہار ہے۔ کم علم اور غیر تربیت یافتہ لوگ کیمرے کے سامنے ہیں اور میڈیا ہاوسز کے مالکان نوے فیصد ایسے ہیں جیسے ایک زمانے میں فلم ساز ان پڑھ گُجر ہوا کرتے تھے

سوچتا ہوں کہ یہ غیرت کے نام پر اسقدر قتل ہمارے ہاں ہی کیوں ہوتے ہیں ۔ سچ کہوں غیرت تو اس پوری قوم اور امت مسلمہ میں نہیں رہی اس ایک بھائی میں کہاں سے آ جانی تھی

 

میں قندیل کو معصوم روح ثابت نہیں کر رہا لیکن اس معاشرتی رویے کی بات کر رہا ہوں جہاں مرد کو نہایا دھویا گھوڑا کہتے ہیں تمام تر گناہ اور جرائم کرنے کے باوجود وہ بے گناہ ہی رہتا ہے

قندیل بلوچ کا قتل سراسر درندگی اور انتقام ہے ۔۔۔۔۔۔۔۔۔ قندیل کیا تھی اور کیا کرتی تھی ، وہ خود اپنے کیئے کی زمیدارتھی ۔ کسی کو حق نہیں پہنچتا تھا کہ اسے قتل کرتا ۔کسی نے بھی اس کے گھریلو حالات پر غور نہیں کیا۔ اس کی غربت پر اس کی معاشی حالت پر۔ پیٹ بھرنے کے لیئے اسکے پاس یہی راستہ بچا تھا ماڈل گرل بننے کا کہ جس سے اسے شہرت بھی ملی اور روٹی بھی۔ ازدواجی زندگی میں وہ نہیں بلکہ اُسکا شوہر اُسکے ساتھ نہیں چل پایا۔

 

قندیل بلوچ کو پاکستانی سوشل میڈیا کا سپر اسٹار سمجھا جاتا تھا اور جہاں فیس بک پر انہیں فالو کرنے والوں کی تعداد پانچ لاکھ سے زیادہ ہے وہیں ان کا شمار پاکستان میں گوگل پر سب سے زیادہ تلاش کیے جانے والی دس شخصیات میں ہوتا تھا۔

غیرت کے نام پر نہ تو یہ پہلی قندیل قتل ہوئی ہے اور نہ آخری۔ ہاں جب اس معاشرے میں حقیقی معنوں میں غیرت بیدار نہیں ہو جائے گی اسوقت تک غیرت کے نام پر قتل ہوتے رہیں گے

برطانیہ کے شہر ڈربی میں مقیم میری بہت پیاری دوست، انتہائی بہترین مصورہ اور درد دل کی حامل ناہید چٹھہ نے فیس بُک پر کہیں یہ فقرہ لکھا تھا اور کب سے اس فقرے کے ساتھ ساکت وجامد تنہا کھڑا ہوں